CAPITULO 1
1 TUTUJON y ibangelion Jesucristo, Lajin Yuus.
2 Jaftaemano esta matugue gui profeta Isaias: Estagüe, guajo tumago y tentagojo gui menan matamo, para ufamauleg y chalanmo gui menamo.
3 Ynagang ni umaagang gui desierto: Fanmauleg y chalan y Señot: natunas y cayejonña.
4 Si Juan managpange gui desierto, ya jasetmon y tinagpangen minañotsot para inasiin isao sija.
5 Ya manjanao guiya güiya guato todo y tano Judea, yan todo sija guiya Jerusalem; ya todo sija mantinagpange gui sadog Jordan, ya jaconfesatñaejon y isaoñija.
6 Ya si Juan minagagon pulon cameyo, yan sinturon cuero gui senturaña; ya y naña, apacha yan miet monte.
7 Ya mansesetmon, ilegña: Ufato gui tateco uno na masgaeninasiña qui guajo, y coreas y sapatosña, ti digno yo nu jutecon ya jupula.
8 Guajo magajet na jutagpange jamyo yan janom; lao güiya infantinagpange ni Espiritu Santo.
9 Ya susede ayo sija na jaane, na si Jesus mato guine Nasaret Galilea, ya tinagpange as Juan gui Jordan.
10 Ya enseguidas nae cajulo gui janom, jalie na mababa y langet, ya y Espiritu, calang paluma tumunog gui jiloña,
11 Ya mato un inagang guine y langet na ilegña: Jago y lajijo ni yajo, iya jago nae gosmagof yo.
12 Ya enseguidas ninafalag y desierto ni Espiritu.
13 Ya sumaga güije cuarenta na jaane, ya tinienta as Satanas; yan mañisija y manmachaleg na gâgâ sija; ya y angjet sija masetbe güe.
14 Anae munjayan si Juan mapreso, mato si Jesus guiya Galilea, jasesetmon y ibangelion Yuus.
15 Ya ilegña: Y tiempo esta macumple; ya y raenon Yuus esta jijot: fanmañotsot, ya injenggue y ibangelio.
16 Ya mamomocat gui oriyan tasen Galilea, jalie si Simon, yan si Andres chelun Simon, na jayuyute y lagua gui tase, sa sija manpescadot.
17 Ya si Jesus ilegña nu sija: Maela dalalagyo, ya junafanpescadot taotao jamyo.
18 Enseguidas japolo y laguañija ya madalalag güe.
19 Anae malofan talo didide mona, jalie si Santiago, lajin Sebedeo, yan si Juan cheluña, na manestaba locue gui batco na jalememenda y laguañija.
20 Ya enseguidas jaagang; ya jadingo si tatanñija as Sebedeo gui batco yan y manmachocho sija, ya madalalag güe.
21 Ya manjalom Capernaum; ya enseguidas, gui sábado na jaane, jumalom gui sinagoga ya mamanagüe.
22 Ya sija ninafanmanman ni finanagüeña; sa jafananagüe sija calang uno ni gaeninasiña, ya ti calang y escriba sija.
23 Ya enseguidas guaja güije gui sinagogañija un taotao na guaja áplacha na espiritu, ya güiya umagang,
24 Ylegña: Parajafa jam nu jago, Jesus taotao Nasaret? Matojao para unnafanaelayejam? Jutungoja jayejao, jago y Santos guine as Yuus.
25 Ya si Jesus jalalatde ilegña: Pacaca, ya maela juyong guiya güiya.
26 Ya anae y áplacha na espiritu tiniteg güe, ya ninaagang gosdangculo na inagang, jumuyong guiya güiya.
27 Ya todo sija ninafanmanman, pot este manafaesen entre sija, ilegñija: Jafa este? Jafa na nuebo finanagüe este! yan ninasiña jatago y manáplacha na espiritu, ya maosgueja güe?
28 Enseguidas y famaña manamamta todo gui tano oriyan Galilea.
29 Ya enseguidas anae jumuyong gui sinagoga, mato gui guima Simon yan si Andres, yan si Santiago yan si Juan.
30 Ya y suegran Simon estaba na umaason sa malango yan calentura: ya masangane güe enseguidas nu y palaoan.
31 Ayo nae mato güe, ya jamantiene canaeña, ya jajatsa julo; ya pinelo ni calentura, ya güiya sumetbe sija.
32 Ya anae estaba esta pupuenge, anae machom y atdao, maconiigüe todo ni manmañetnot yan y maninanite.
33 Ya todo y siuda mandaña gui petta.
34 Ya janafanjomlo megae ni manestaba manmalango todo clasen chetnot sija; ya jayute juyong megae na anite sija; ya ti japolo nu y anite sija cumuentos sa matungo güe.
35 Ya y egaan güije, cajulo gostaftaf, jojomjomja trabia, ya jumuyong, ya malag y un lugat desierto, ya manaetae güije.
36 Ya tinatiye güe as Simon, yan y mangachochongña.
37 Ya anae masoda güe, ilegñija nu güiya: Todo umaliligaojao.
38 Güiya ilegña nu sija: Nije tafanmalag y otro lugat gui sengsong ni jijot, ya jufansetmon locue güije; sa pot este na matoyo.
39 Ya jumalom gui sinagogañija todo Galilea, sesetmon ya jayuyute juyong y anite sija.
40 Ya un ategtog mato guiya güiya, tinayuyut güi ya dumimo, ya ilegña: Yaguin malagojao, siña unnagasgasyo.
41 Ya si Jesus ninamaase ya jaestira y canaeña, ya japacha, ya ilegña: Malagoyo, ungasgas.
42 Ya enseguidas y chetnot y ategtog mapos guiya güiya ya gasgas güe.
43 Ya jagosencatga, ya jatago na ujanao,
44 Ya ilegña nu güiya: Atan ya chamo sumangangane ni jaye jafa; lao sigueja gui jinanaomo ya unfanue y pale nu jago, ya unofrese ni guinasgasmo ni si Moises manago, para testimonioñija.
45 Lao güiya mapos, ya jatutujon munamatungo, yan janagosmamta y checho; pot este, si Jesus ti siña jumalom matungo nu güiya gui siuda; lao sumasagaja gui sumanjiyong gui lugat desierto sija, ya manmato guiya güiya guinin todo y patte sija.
KAPÍTULU 1
1 Tutuhon i ebanghelion Jesukristo, Låhen Yu’os.
2 Haftaimanu esta matuge’ gi profeta Isaias: Éstague’, guåhu tumågo’ i tentago’-hu gi me’nan matå-mu, para u fa’maolek i chalån-mu gi me’nå-mu.
3 Inagang ni umå’agang gi disietto: Fanmaolek i chalan i Siñot: na’tunas i kayehon-ña.
4 Si Juan manakpånge gi disietto, ya ha setmon i tinakpången minañotsot para inasi’en isao siha.
5 Ya manhånao gi iya guiya guatu todu i tano’ Judea, yan todu siha giya Jerusalem; ya todu siha mantinakpånge gi saddok Jordan, ya ha konfesatñaihon i isao-ñiha.
6 Ya si Juan minagågon pulon kameyu, yan sentorón kueru gi senturå-ña; ya i na’-ña, apåcha’ yan miet monte.
7 Ya mansésetmon (audio: sinésetmon), ilek-ña: u fåtto gi tatte-ku unu na mås gáinina’siña ki guåhu, i korehas i sapatos-ña, ti digno yu’ nu hu tekkon ya hu pula’.
8 Guåhu magåhet na hu takpånge hamyo yan hånom; lao guiya en fantinakpånge ni’ Espiritu Sånto.
9 Ya susedi ayu siha na ha’åni, na si Jesus måtto ginen Nasaret Galilea, ya tinakpånge as Juan gi Jordan.
10 Ya ensigidas nai kahulo’ gi hanom, ha li’e’ na mababa i langet, ya i Espiritu, kalang paluma tumunok gi hilo’-ña,
11 Ya måtto un inagang ginen i langet na ilek-ña: Hågu i lahi-hu ni’ ya-hu, iya hågu nai gósmagof yu’.
12 Ya ensigidas nina’falak i disietto ni Espiritu.
13 Ya sumåga guihi kuårenta na ha’åni, ya tinienta as Satanås; yan mañisiha i manmachålek na gå’ga’ siha; ya i anghet siha ma setbe gui’.
14 Annai monhåyan si Juan mapresu, måtto si Jesus gi iya Galilea, ha sésetmon i ebanghelion Yu’os.
15 Ya ilek-ña: I tiempo esta makomple; ya i rainon Yu’os esta hihot: fanmañotsot, ya en hengge i ebanghelio.
16 Ya mamómokkat gi uriyan tåsen Galilea, ha li’e’ si Simón, yan si Andrés che’lon Simon, na ha yúyute’ i lagua’ gi tasi, sa’ siha mameskadót (audio:mampeskadót).
17 Ya si Jesus ilek-ña nu siha: Maila’ dálalak yu’, ya hu na’fameskadót (audio: na’fanpeskadót) taotao hamyo.
18 Ensigidas ha po’lo i lagua’-ñiha ya madálalak gui’.
19 Annai maloffan ta’lo didide’ mo’na, ha li’e’ si Santiågo, låhen Sebedeo, yan si Juan che’lu-ña, na maneståba lokkue’ gi batko na ha lemémenda i lagua’-ñiha.
20 Ya ensigidas ha ågang; ya ha dingu si tatan-ñiha as Sebedeo gi i batko yan i manmacho’cho’ siha, ya ma dálalak gui’.
21 Ya manhålom Capernaum; ya ensigidas, gi såbadu na ha’åni, humålom gi sinagoga ya mama’nå’gue.
22 Ya siha nina’fanmanman ni fina’nå’gue-ña; sa’ ha fa’nåna’gue siha kalang unu ni gáinina’siña, ya ti kalang i eskriba siha.
23 Ya ensigidas guaha guihi gi sinagogan-ñiha un taotao na guaha áplacha’ na espiritu, ya guiya umågang,
24 Ilek-ña: Para håfa ham nu hågu, Jesus taotao Nasarét? Måtto hao para un na’fanáilaye ham? Hu tungo’ ha’ håyi hao, hågu i Santos ginen as Yu’os.
25 Ya si Jesus ha lalåtde ilek-ña: Påkaka’, ya maila’ huyong giya guiya.
26 Ya annai i áplacha’ na espiritu tinitek gui’, ya nina’a’gang gosdångkolo na inagang, humuyong giya guiya.
27 Ya todu siha nina’fanmanman, put este manáfaisen entre siha, ilek-ñiha: Håfa este? Håfa na nuebon fina’nå’gue este! Yan nina’siña ha tågo’ i manáplacha’ na espiritu, ya ma osge ha’ gui’?
28 Ensigidas i famåña mana’måmta’ todu gi tano’ uriyan Galilea.
29 Ya ensigidas annai humuyong gi sinagoga, måtto gi gima’ Simon yan si Andres, yan si Santiågo yan si Juan.
30 Ya i sogran Simon eståba na umå’asson sa’ malångu yan kalentura: ya masangåni gui’ ensigidas nu i palao’an.
31 Ayu nai måtto gui’, ya ha mantieni i kannai-ña, ya ha håtsa hulo’; ya pine’lo ni kalentura, ya guiya sumetbe siha.
32 Ya annai eståba esta pupuengi, annai måchom i atdao, makonne’i gui’ todu ni manmañetnot yan i maninaniti.
33 Ya todu i siudá mandanña’ gi i petta.
34 Ya ha na’ fanhomlo’ meggai ni maneståba manmalångu todu klåssen chetnot siha; ya ha yute’ huyong meggai na aniti siha; ya ti ha po’lo nu i aniti siha kumuentos sa’ matungo’ gui’.
35 Ya i egga’an guihi, kahulo’ goståftaf, hóhomhom ha’ trabiha, ya humuyong, ya malak i un lugåt disietto, ya manaitai guihi.
36 Ya tinattiyi gui’ as Simon, yan i mangga’chóchong-ña.
37 Ya annai masodda’ gui’, ilek-ñiha nu guiya: Todu umalíligao hao.
38 Guiya ilek-ña nu siha: Nihi ta fanmalak i otro lugåt gi i sengsong ni hihot, ya hu fañetmon lokkue’ guihi; sa’ put este na måtto yu’.
39 Ya humålom gi sinagogan-ñiha todu Galilea, sé’setmon ya ha yúyute’ huyong i aniti siha.
40 Ya un atektok måtto giya guiya, tinayuyut gui’ ya dumimu, ya ilek-ña: Yanggen malago’ hao, siña un na’gåsgas yu’.
41 Ya si Jesus nina’ma’åse’ ya ha estira i kannai-ña, ya ha pacha, ya ilek-ña: Malago’ yu’, un gåsgas.
42 Ya ensigidas i chetnot i atektok må’pos giya guiya ya gåsgas gui’.
43 Ya ha gosenkåtga, ya ha tågo’ na u hånao,
44 Ya ilek-ña nu guiya: Atan ya cha’-mu sumangångani ni håyi håfa; lao sigi ha’ gi hinanao-mu ya un fa’nu’i i pale’ nu hågu, ya un ufresi ni’ ginasgås-mu ni’ si Moisés manågo’, para testimonion-ñiha.
45 Lao guiya må’pos, ya ha tutuhon muna’matungo’, yan ha na’gosmåmta’ i che’cho’; put este, si Jesus ti siña humålom matungo’ nu guiya gi siudá; lao sumåsaga ha’ gi suménhiyong gi lugåt disietto siha, ya manmåtto gi iya guiya ginen todu i patte siha.
Put fabót, leave a comment or ask a question below.