CAPITULO 15
1 YA enseguidas y egaan güije, y magas mamale yan y manamco, yan y escriba sija, yan todo y inetnon ofisiat manaconseja entaloñija, ya magode si Jesus, ya macone, ya maentrega si Pilato.
2 Ya finaesen as Pilato, ilegña nu güiya: Jago y Ray Judios? Ya manope ilegña: Jago sumangan.
3 Ya mafaaela ni y magas mamale, megae sija na güinaja.
4 Ya finaesen güe talo as Pilato, ilegña: Ti unfanope ni jafa? liija na minegae finaela contra jago.
5 Lao si Jesus ti manope ni jafa; ayo mina ninamanman si Pilato.
6 Ya ayo na gupot, y costumbre masosotta un preso, yanguin jagagao jaye y malagoñija.
7 Ya guaja güije uno, y naanña si Barabas, na mapreso yan y mangachongña gui un jatsamiento; sija manmamuno anae mangajulo gui jatsamiento.
8 Ya y linajyan taotao manmato jijot, ya jatutujon manmangaogao na ufatinas taegüije y guinen jafatinas guiya sija,
9 Lao si Pilato manope sija, ilegña: Manmalago jamyo na jusottaye jamyo y Ray Judios?
10 Sa jatungo, na ayo na maentrega ni y magas mamale, pot y embidia.
11 Lao y magas mamale jatago y taotao sija, na ujagagao na si Barabas umasotta.
12 Ya si Pilato manope ilegña talo nu sija: Jafanae malagomiyo jufatinas ayo y infananaan Ray Judios?
13 Ya managang talo ilegñija: Atane gui quiluus.
14 Ayonae si Pilato, ilegña nu sija: Jafa na taelaye finatinasña? Ya mas managang, ilegñija: Atane gui quiluus.
15 Ya si Pilato, malago na ufanmagof y taotao sija, jasottaye sija si Barabas, ya maentrega si Jesus, anae munjayan masaulag, para umaatane gui quiluus.
16 Ya maosgaejon ni y sendalo sija, guato gui patio mafanaan Pretorio; ya madaña todo y mangachong.
17 Ya manaminagago púrpura, ya matufog un coronan tituca.
18 Ya matutujon masaluda, ilegñija: Jafa tatatmanojao Ray Judios!
19 Ya mapanag y iluña ni y piao, ya matolae güe, yan mandidimo, ya maadodora güe.
20 Ya anae munjayan mamofeagüe, manajanao y púrpura, ya manaminagago ni y magaguñaja. Ya macone güe para umaatane gui quiluus.
21 Ya manacatga uno ni y malolofan para ufañija, si Simon Sirineo, tatan Alejandro yan Rufo, na mato guinen y fangualuan, para uquinatgaye ni y quiluus Jesus.
22 Ya macone guato gui un lugat na y naanña Golgota: cumequeilegña, Sagan calabera.
23 Ya manae guimenña, bino manadaña yan mira, lao ti jaresibe.
24 Ya maatane güe gui quiluus, manafacae ni magaguña; ya manrifa jaye uchinile cada uno.
25 Ya y mina tres na ora, anae maatane güe gui quiluus.
26 Ya y tinigue y fumaaelagüe, matugue gui sanjilo. Y RAY JUDIOS.
27 Ya maatane dos na saque yan güiya: y uno gui agapaña, ya y otro gui acagüeña.
28 (Ya macumple y tinigue ni y ilegña: Güiya, usaouao matufong yan y manisao.)
29 Ya macacase todo ni y manmalolofan, ya jayeyengyong y ilonñija, ya ilegñija: Ay! jago ni y unyulang y templo, ya unjatsa talo gui mina tres na jaane;
30 Satba maesajao, ya maela tunog papa güenao gui quiluus.
31 Taegüenaoja locue y magas mamale, manmanbotlelea gui entaloñija, ya ilegñija yan y escriba sija: Jasatba y palo, ya güiya na maesa ti siña güe jasatba.
32 Si Cristo y Ray Israel, polo ya utunog pago gui quiluus, para utafanlie, ya utafanjonggue güe. Yan ayo y mangachochongña manmaatane gui quiluus madespresia güe.
33 Ya anae mato y mina saes na ora, jomjom todo y tano asta y mina nuebe na ora.
34 Ya y mina nuebe na ora, janagosagang si Jesus ilegña: Eli, Eli, lama sabactani? cumequeilegña: Yuusso, Yuusso, jafa muna undingoyo?
35 Ya palo ni y manotojgue gui oriyaña, anae majungog güe, ilegñija: Estagüe na jaaagang si Elias.
36 Ya malago uno, ya jasupog y espongja gui binagle, ya japolo gui puntan y piao, ya janae para uguimen, ya ilegña: Poloja güe namaesa; ya utafanlie cao ufato si Elias, ya uninatunog.
37 Ya si Jesus umagang goságang, ya jaentrega y espiritu.
38 Ya y cottinan y templo, masisen dos pedaso, y sanjilo asta y sanpapa.
39 Ya anae y senturion ni y tumotojgue gui menaña, linie, na taegüenao jaentrega y espiritu, ilegña: Magajet na este na taotao Lajin Yuus.
40 Ya mangaegue locue sija famalaoan, na maaatan gui chago, ya entre sija estaba si Maria Magdalena, yan si Maria nanan Santiago y patgon, yan si José, yan si Salome;
41 Ni y anae estaba güe guiya Galilea, madalalag güe, ya masetbe güe; yan megae sija na famalaoan mangachochongña julo guiya Jerusalem.
42 Ya anae estaba pupuenge, sa ayo na jaane y Preparasion, cumequeilegña y jaane antes di y sábado,
43 Mato si José, taotao Arimatea, mauleg na taotao na pápagat, ni y jananangga locue y raenon Yuus; ya mapos yan atrebe malag as Pilato, ya jagagao y tataotao Jesus.
44 Ya ninamanman si Pilato, cao esta matae; ya jaagang y senturion, ya jafaesen cao esta matae algun tiempo.
45 Ya anae jatungo gui senturion; janae si José ni y tataotao.
46 Ya güiya mamajan fino na magagao; ya janatunog y tataotaoña ya jabalutan ni y fino na magago, ya japolo gui un naftan ni maguadog gui acho, ya janagaliligue guato un acho, gui pettan y naftan.
47 Ya si Maria Magdalena, yan si Maria nanan José, jalie amano nae mapolo.
KAPÍTULU 15
1 Ya ensigidas i egga’an guihi, i ma’gas mamåle’ yan i manåmko’, yan i eskriba siha, yan todu i inetnon ofisiåt manákonseha entalo’-ñiha, ya ma godde si Jesus, ya ma konne’, ya ma entrega si Pilåto.
2 Ya finaisen as Pilåto, ilek-ña nu guiya: Hågu i Rai Judihos? Ya manoppe ilek-ña: Hågu sumångan.
3 Ya mafa’aila’ ni’ i ma’gas mamåle’, meggai siha na guinaha.
4 Ya finaisen gui’ ta’lo as Pilåto, ilek-ña: Ti un fanoppe ni håfa? Li’e’ ha’ na mineggai finaila’ kontra hågu.
5 Lao si Jesus ti manoppe ni håfa; ayu mina’nina’manman si Pilåto.
6 Ya ayu na gupot, i kostumbre masósotta un presu, yanggen ha gågao håyi i malago’-ñiha.
7 Ya guaha guihi unu, i na’ån-ña si Barabas, na mapresu yan i mangga’chong-ña gi un håtsamiento; siha manmamuno’ annai mangahulo’ gi hatsamiento.
8 Ya i linahyan taotao manmåtto hihot, ya ha tutuhon manmanggågao na u fa’tinas taiguihi i ginen ha fa’tinas giya siha,
9 Lao si Pilåto manoppe siha, ilek-ña: Manmalago’ hamyo na hu sottåyi hamyo i Rai Judihos?
10 Sa’ ha tungo’, na ayu na ma entrega ni’ i ma’gas mamåle’, put i embidia.
11 Lao i ma’gas mamåle’ ha tågo’ i taotao siha, na u ha gågao na si Barabas u masotta.
12 Ya si Pilåto manoppe ilek-ña ta’lo nu siha: Håfa nai malago’-miyu hu fa’tinas ayu i in fa’nána’an Rai Judihos?
13 Ya manågang ta’lo ilek-ñiha: Atåni gi kilu’os.
14 Ayu nåi si Pilåto, ilek-ña nu siha: Håfa na tailayi fina’tinås-ña? Ya mås manågang, ilek-ñiha: Atåni gi kilu’os.
15 Ya si Pilåto, malago’ na u fanmagof i taotao siha, ha sottåyi siha si Barabas, ya ma entrega si Jesus, annai monhåyan ma saolak, para u ma’atåni gi kilu’os.
16 Ya ma osgaihon ni’ i sendålu siha, guatu gi patio mafa’na’an Pretorio; ya mandanña’ todu i mangga’chong.
17 Ya ma na’minagågu púrpura, ya matufok un koronan tituka’.
18 Ya matutuhon masaluda, ilek-ñiha: Håfa tatatmanu hao Rai Judihos!
19 Ya ma panak i ilu-ña ni’ i pi’ao, ya ma to’la’i gui’, yan mandídimu, ya ma adádora gui’.
20 Ya annai monhåyan ma mufeha gui’, ma na’hånao i púrpura, ya ma na’minagågu ni’ i magagu-ña ha’. Ya ma konne’ gui’ para u ma’atåni gi kilu’os.
21 Ya ma na’kåtga unu ni’ i malóloffan para u fañiha, si Simon Sirineo, tåtan Alehåndro yan Rufo, na måtto ginen i fangualu’an, para u kinatgåyi ni’ i kilu’os Jesus.
22 Ya ma konne’ guatu gi un lugåt na i na’ån-ña Golgota: kuméke’ilek-ña, Sagan kalabera.
23 Ya ma nå’i gimen-ña, binu ma na’daña yan mira, lao ti ha resibi.
24 Ya ma atåni gui’ gi kilu’os, manáfakkai ni magagu-ña; ya manrifa håyi u chinile’ kada unu.
25 Ya i mina’tres na ora, annai ma atåni gui’ gi kilu’os.
26 Ya i tinige’ i fuma’aila’ gui’, matuge’ gi sanhilo’.
27 Ya ma atåni dos na sakke yan guiya: i unu gi agapa’-ña, ya i otro gi akague-ña.
28 (Ya makumple i tinige’ ni’ i ilek-ña: Guiya, u saonao matufong yan i manisao.)
29 Ya ma kákasse todu ni’ i manmalóloffan, ya ha yéyengyong i ilon-ñiha, ya ilek-ñiha: Ay! Hågu ni’ i un yulang i templo, ya un håtsa ta’lo gi mina’tres na ha’åni;
30 Såtban maisa hao, ya maila’ tunok påpa’ guenao gi kilu’os.
31 Taiguenao ha’ lokkue’ i ma’gas mamåle’, manmanbotléle’a gi entalo’-ñiha, ya ilek-ñiha yan i eskriba siha: Ha såtba i palu, ya guiya na maisa ti siña gui’ ha såtba.
32 Si Kristu i Rai Israet, po’lo ya u tunok på’go gi kilu’os, para u ta fanli’e’, ya u ta fanhongge gui’. Yan ayu i mangga’chóchong-ña manma’atåni gi kilu’os ma despresia gui’.
33 Ya annai måtto i mina’sais na ora, homhom todu i tano’ asta i mina’nuebi na ora.
34 Ya i mina’nuebi na ora, ha na’gosa’gang si Jesus ilek-ña: Eli, Eli, lama sabactani? Kuméke’ilek-ña: Yu’os-hu, Yu’os-hu, håfa muna’ un dingu yu’?
35 Ya palu ni’ i manótohge gi uriyå-ña, annai mahungok gui’, ilek-ñiha: Éstague’ na ha å’agang si Elias.
36 Ya malågu unu, ya ha supok i espongha gi binakle, ya ha po’lo gi puntan i pi’ao, ya ha nå’i para u gimen, ya ilek-ña: Po’lo ha’ gui’ na maisa; ya u ta fanli’e’ kao u fåtto si Elias, ya u nina’tunok.
37 Ya si Jesus umågang gosa’gang, ya ha entrega i espiritu.
38 Ya i kottinan i templo, masisen dos pidåsu, i sanhilo’ asta i sampapa’.
39 Ya annai i senturion ni’ i tumótohge gi me’nå-ña, lini’e’, na taiguennao ha entrega i espiritu, ilek-ña: Magåhet na este na taotao Låhen Yu’os.
40 Ya manggaige lokkue’ siha famalao’an, na ma’á’atan gi chågo’, ya entre siha eståba si Maria Magdalena, yan si Maria nånan Santiågo i patgon, yan si José, yan si Salomé;
41 Ni i annai eståba gui’ giya Galilea, ma dálalak gui’, ya ma setbe gui’; yan meggai siha na famalao’an mangga’chóchong-ña hulo’ giya Jerusalem.
42 Ya annai eståba pupuengi, sa’ ayu na ha’åni i Preparasión, kuméke’ilek-ña i ha’åni antes di i såbadu,
43 Måtto si José, taotao Arimate’a, maolek na taotao na påpagat, ni’ i ha nánangga lokkue’ i rainon Yu’os; ya må’pos yan atrebi malak as Pilåto, ya ha gågao i tátaotao Jesus.
44 Ya nina’manman si Pilåto, kao esta måtai; ya ha ågang i senturion, ya ha faisen kao esta måtai atgún tiempo.
45 Ya annai ha tungo’ gi senturion; ha nå’i si José ni’ i tátaotao.
46 Ya guiya mamåhan finu na magågu; ya ha na’tunok i tataotao-ña ya ha balutan ni’ i finu na magågu, ya ha po’lo gi un naftan ni maguaddok gi acho’, ya ha na’galíligui guatu un åcho’, gi pettan i naftan.
47 Ya si Maria Magdalena, yan si Maria nånan José, ha li’e’ amånu nai mapo’lo.
Put fabót, leave a comment or ask a question below.