CAPITULO 10
1 YA cajulo güije, mato qui oriyan Judea, gui otro bandan Jordan; ya manalo y linajyan taotao mandaña guiya güiya; ya jatalo fumanagüe, taegüije, y costumbreña.
2 Ya manmato y Fariseo sija guiya güiya, ya mafaesen güe cao tunas y laje uyute y asaguaña? matietienta güe.
3 Lao güiya manope, ilegña nu sija: Jafa mantinago jamyo as Moises?
4 Ya sija ilegñija: Si Moises japetmite na umatugue papet inapattan umasagua ya uyute.
5 Ya si Jesus manope, ilegña nu sija: Pot y majetog corasonmiyo na mantiniguie jamyo ni este na tinago.
6 Lao desde tutujon y jiniyong, Laje yan palaoan fumatinas sija Yuus.
7 Pot este na rason y laje udingo si tataña yan si nanaña, ya udaña yan y asaguaña.
8 Ya y este y dos, umana unoja na catne; ya esta ti udos mas, na unoja na catne.
9 Jafaja si Yuus munadaña, y taotao ti unadesapatta.
10 Ya y jalom guma, y disipulo sija mafaesen güe talo ni ayoja.
11 Ya ilegña nu sija: Jayeja y yumute y asaguaña, ya umasagua yan otro, jafatinas y adulterio contra y palaoan.
12 Ya yaguin y palaoan yumute y asaguaña, ya umasagua yan otro, jafatinas adulterio.
13 Ya machulie guato guiya güiya diquique na famaguon para upacha: ya y disipulo sija jalalatde ayo sija.
14 Ya anae jalie si Jesus, sen ti ninamagof ya ilegña nu sija: Polo y diquique na famaguon ya ufanmamaela guiya guajo; chamiyo chumochoma; sa iyon este sija y raenon Yuus.
15 Magajet jusangane jamyo, na y ti rumesibe y raenon Yuus calang un patgon, ti ujalom gui jalom ayo.
16 Ya jajogüe sija ya japolo y canaeña gui jiloñija, ya jabendise sija.
17 Ya anae jumanao gui chalan, mato uno malalago ya dinimuye güe gui menaña ya finaesen güe: Mauleg na Maestro, jafa jufatinas para juereda y taejinecog na linâlâ?
18 Si Jesus ilegña nu güiya: Jafa na ilegmo nu guajo mauleg? Taya mauleg, na unoja, si Yuus.
19 Untungo y tinago sija: Chamofamumuno; chamo fumatinas adulterio; chamo fañañaque; chamo sumanganñaejon y ti magajet na testimonio; chamo chumu y ti iyomo; onra si tatamo yan si nanamo.
20 Güiya manope ilegña: Maestro, todo este juadadaje desde nae patgonyo.
21 Ayo nae matan güe as Jesus, güinaeya güe, ya ilegña nu güiya: Fatta jao uno: Janao ya ufajan todo y güinajamo, ya unnae y mamobble sija, ya uguaja güinajamo gui langet: ya maela, ya undalalag yo.
22 Lao güiya ninamatolaeca y mataña ni este na sinangan ya mapos ninatriste; sa guaja megae güinajaña.
23 Ayo nae si Jesus manatan gui oriya, ya ilegña ni disipuluña sija: Na minapot manjalom gui raenon Yuus ayo sija y mangaegüinaja!
24 Ya y disipulo sija ninafanmanman ni sinanganña: Lao si Jesus manope ilegña talo: Famaguon, na minapot manjalom, gui raenon Yuus y umangongoco sija gui güinaja!
25 Mas guse malofan un cameyo gui matan un jaguja, qui y gaegüinaja ujalom gui raenon Yuus.
26 Ya sija ninagos fanmanmanman, ya ilegñija nu güiya: Ayo nae, jaye siña satbo?
27 Ayo nae si Jesus jaatan sija, ya ilegña: Para y taotao sija, este ti siña, lao para si Yuus ti taegüine; sa para si Yuus todo ninasiña.
28 Ayonae si Pedro jatutujon ilegña nu güiya: Estagüejamja na indingo todo, ya indadalalagjao.
29 Inepe as Jesus ilegña. Magajet jusanganejao: Taya ni un taotao ni y dumingo gumaña, pat mañeluña lalaje, pat mañeluña famalaoan, pat nanaña, pat tataña, pat famaguonña, pat fangualuaña, pot guajo, yan y ibangelio;
30 Na ti uresibe pagoja sienbiaje: guma sija, yan mañeluña lalaje, yan mañeluña famalaoan, yan nanaña, yan famaguonña, yan fangualuan sija, yan umapetsigue; ya y mámamaela na siglo, taejinecog na linâlâ.
31 Lao megae na manfinenana, ufanuttimo, ya y manuttimo, ufanfinenana.
32 Ya anae mangaegue gui chalan, mangajulo guiya Jerusalem; ya si Jesus malag y menañija; ya ninafanmanman: ya y dumadalalag mangosmaañao. Ya jacone talo y dose, ya jatutujon sumangane sija jafa ususede güe.
33 Ylegña: Estagüejit na mangajulo guiya Jerusalem, ya y Lajin taotao umaentrega gui magas mamale, yan y escriba sija, ya umasentensia para umapuno, ya umaentrega gui Gentiles.
34 Ya umamofea, yan umatolae, yan umasaulag, yan umapuno; ya y despues di tres na jaane ucajulo talo.
35 Ya si Santiago yan si Juan, lalajin Sebedeo, manmato jijot guiya güiya ya ilegñija nu güiya: Maestro, manmalagojam na unfatinas guiyajame jafa y malagomame.
36 Ya ilegña nu sija: Jafa malagonmiyo na jufatinas guiya jamyo?
37 Ilegñija nu güiya: Nafanmatachongjam, y uno gui agapamo, ya y otro gui acagüemo, gui minalagmo.
38 Si Jesus ilegña nu sija: Ti intingo jafa ingagagao. Siña jamyo manguimen gui copa anae gumiguimenyo? yan infanmatagpange ni y matagpangeco?
39 Ya ilegñija nu güiya: Mansiñajam. Ayonae ilegña si Jesus nu sija: infanguimen gui copa anae gumiguimenyo, yan infanmatagpange ni y ma tagpangeco;
40 Lao y infanmatachong gui agapajo, yan y acagüeco; ti guajo jufannae; lao para ayo sija ufanmanae y manmapreparaye.
41 Ya anae majungog este ni y dies, ninafanlalalo as Santiago yan Juan.
42 Lao maninagang as Jesus ya ilegña nu sija: Intingo na ayo y manmanafanmagas gui Gentiles, jafatinas minagas gui jiloñija; ya y manmagas, jafatinas ninasiña gui jiloñija.
43 Lao ti utaegüenao guiya jamyo; sa jaye y malago dumangculo guiya jamyo; güiya ufañeñetbe.
44 Ya jaye guiya jamyo y malago mumagas; utentago para todo.
45 Sa magajet ni y Lajin taotao ti mato para umasetbe, lao para ufañetbe, ya para ufannae y jaaniña ni un rescate para unafanlibre megae.
46 Ya manmato Jerico. Ya anae manjanao gui Jerico, yan y disipuluña yan un dangculon linajyan taotao, si Bartimeo lajin Timeo, na bachet, matatachong gui oriyan chalan, ya umegagao.
47 Ya anae jajungog na si Jesus Nasareno, jatutujon umagang ilegña: Jesus, Lajin David, gaease nu guajo.
48 Ya megae mumomye para ufamatquilo: lao mas umagang gosagang: Jago ni y Lajin David, gaease nu guajo.
49 Ya si Jesus tumojgüe ya ilegña: Agang güe. Ya maagang y bachet ilegñija nu güiya: Magofjao; cajulo sa inaagangjao.
50 Ya janasuja y capaña, y cajulo, ya malag as Jesus.
51 Ya si Jesus manopegüe ya ilegña: Jafa malagomo jufatinas guiya jago? Y bachet ilegña nu güiya: Raboni, nafanliiyo.
52 Si Jesus ilegña: Janao, y jinengguemo munajomlojao. Ya enseguidas manlie, ya jadalalag si Jesus gui jinanaoña.
KAPÍTULU 10
1 Ya kahulo’ guihi, måtto ki uriyan Judea, gi otro båndan Jordan; ya mana’lo i linahyan taotao mandanña’ giya guiya; ya ha ta’lo fuma’nå’gue, taiguihi, i kostumbre-ña.
2 Ya manmåtto i Fariseho siha giya guiya, ya ma faisen gui’ kao tunas i lahi u yute’ i asaguå-ña? Matiétienta gui’.
3 Lao guiya manoppe, ilek-ña nu siha: Håfa mantinago’ hamyo as Moisés?
4 Ya siha ilek-ñiha: Si Moisés ha petmiti na u matuge’ påppet inapattan umásagua ya u yute’.
5 Ya si Jesus manoppe, ilek-ña nu siha: Put i mahetok kurason-miyu na mantinigi’e hamyo ni este na tinago’.
6 Lao desde tutuhon i hiniyong, Låhi yan palao’an fuma’tinas siha Yu’os.
7 Put este na rason i lahi u dingu si tatå-ña yan si nanå-ña, ya u danña’ yan i asaguå-ña.
8 Ya i este i dos, u mana’unu ha’ na kåtne; ya esta ti u dos mås, na unu ha’ na kåtne.
9 Håfa ha’ si Yu’os muna’danña’, i taotao ti u na’desapåtta.
10 Ya i halom guma’, i disipulu siha ma faisen gui’ ta’lo ni ayu ha’.
11 Ya ilek-ña nu siha: Håyi ha’ i yumute’ i asaguå-ña, ya umásagua yan otro, ha fa’tinas i adutterio kontra i palao’an.
12 Ya yanggen i palao’an yumute’ i asaguå-ña, ya umásagua yan otro, ha fa’tinas adutterio.
13 Ya machuli’e guatu giya guiya dikike’ na famagu’on para u pacha: ya i disipulu siha ha lalåtde ayu siha.
14 Ya annai ha li’e’ si Jesus, sen ti nina’magof ya ilek-ña nu siha: Po’lo i dikike’ na famagu’on ya u fanmámaila’ giya guåhu; cha’-miyu chumóchomma’; sa’ iyon este siha i rainon Yu’os.
15 Magåhet hu sangåni hamyo, na i ti rumesibi i rainon Yu’os kalang un patgon, ti u hålom gi halom ayu.
16 Ya ha hoggue siha ya ha po’lo i kannai-ña gi hilo’-ñiha, ya ha bendisi siha.
17 Ya annai humånao gi chalan, måtto unu malålagu ya dinimuyi gui’ gi me’nå-ña ya finaisen gui’: Maolek na Ma’estro, håfa hu fa’tinas para hu ereda i taihinekkok na lina’la’?
18 Si Jesus ilek-ña nu guiya: Håfa na ilek-mu nu guåhu maolek? Tåya’ maolek, na unu ha’, si Yu’os.
19 Un tungo’ i tinago’ siha: Cha’-mu famúmuno’; cha’-mu fuma’tinas adutterio; cha’-mu fañåñaki; cha’-mu sumånganñaihon i ti magåhet na testimoniu; cha’-mu chumu i ti iyo-mu; onra si tatå-mu yan si nanå-mu.
20 Guiya manoppe ilek-ña: Ma’estro, todu este hu adádahi desde nai påtgon yu’.
21 Ayu nai matan gui’ as Jesus, guinaiya gui’, ya ilek-ña nu guiya: Fåtta hao unu: Hånao ya u fåhan todu i guinaha-mu, ya un nå’i i mamopble siha, ya u guaha guinaha-mu gi langet: ya maila’, ya un dálalak yu’.
22 Lao guiya nina’matulaika i matå-ña ni este na sinangan ya måpos nina’triste; sa’ guaha meggai guinahå-ña.
23 Ayu nai si Jesus manatan gi uriya, ya ilek-ña ni disipulu-ña siha: Na minappot manhålom gi rainon Yu’os ayu siha i manggáiguinaha!
24 Ya i disipulu siha nina’fanmanman ni sinangån-ña: Lao si Jesus manoppe ilek-ña ta’lo: Famagu’on, na minappot manhålom, gi rainon Yu’os i umangóngokko siha gi guinaha!
25 Mås gusse’ maloffan un kameyu gi matan un haguha, ki i gáiguinaha u hålom gi rainon Yu’os.
26 Ya siha nina’gosfanmánmaman, ya ilek-ñiha nu guiya: Ayu nai, håyi siña såtbo?
27 Ayu nai si Jesus ha atan siha, ya ilek-ña: Para i taotao siha, este ti siña, lao para si Yu’os ti taiguini; sa’ para si Yu’os todu nina’siña.
28 Ayu nai si Pedro ha tutuhon ilek-ña nu guiya: Éstague’ ham ha’ na in dingu todu, ya in dádalalak hao.
29 Ineppe as Jesus ilek-ña. Magåhet hu sangåni hao: Tåya’ ni un taotao ni’ i dumingu gumå’-ña, pat mañe’lu-ña lalåhi, pat mañe’lu-ña famalao’an, pat nanå-ña, pat tatå-ña, pat famagu’on-ña, pat fanggualuån-ña, put guåhu, yan i ebanghelio;
30 Na ti u resibi på’go ha’ sienbiåhi: guma’ siha, yan mañe’lu-ña lalåhi, yan mañe’lu-ña famalao’an, yan nanå-ña, yan famagu’on-ña, yan fanggualu’an siha, yan u mapetsigi; ya i mámamaila’ na siklo, taihinekkok na lina’la’.
31 Lao meggai na mamfine’nana, u fanuttimo, ya i manuttimo, u fanfine’nana.
32 Ya annai manggaige gi chalan, mangahulo’ giya Jerusalem; ya si Jesus malak i me’nan-ñiha; ya nina’fanmanman: ya i dumádalalak manggosma’å’ñao. Ya ha konne’ ta’lo i dosse, ya ha tutuhon sumangåni siha håfa u susedi gui’.
33 Ilek-ña: Éstague’ hit na mangahulo’ giya Jerusalem, ya i Lahen taotao u ma entrega gi ma’gas mamåle’, yan i eskriba siha, ya u ma sentensia para u ma puno’, ya u ma entrega gi Gentiles.
34 Ya u ma mofeha, yan u ma to’la’i, yan u ma saolak, yan u ma puno’; ya i despues di tres na ha’åni u kahulo’ ta’lo.
35 Ya si Santiago yan si Juan, lalåhen Sebedeo, manmåtto hihot giya guiya ya ilek-ñiha nu guiya: Ma’estro, manmalago’ ham na un fa’tinas giya hami håfa i malago’-måmi.
36 Ya ilek-ña nu siha: Håfa malago’-miyu na hu fa’tinas giya hamyo?
37 Ilek-ñiha nu guiya: Na’fanmatå’chong ham, i unu gi agapa’-mu, ya i otro gi akague-mu, gi mina’lak-mu.
38 Si Jesus ilek-ña nu siha: Ti en tingo’ håfa en gågagao. Siña hamyo manggimen gi kopa annai gumígimen yu’? Yan en fanmatakpånge ni’ i matakpange-ku?
39 Ya ilek-ñiha nu guiya: Mansiña ham. Ayu nai ilek-ña si Jesus nu siha: en fanggimen gi kopa annai gumígimen yu’, yan en fanmatakpånge ni’ i matakpange-ku;
40 Lao ti en fanmatå’chong gi agapa’-hu, yan i akague-ku; ti guåhu hu fannå’i; lao para ayu siha u fanmanå’i i manmapreparåyi.
41 Ya annai mahungok este ni’ i dies, nina’fanlalålo’ as Santiago yan Juan.
42 Lao maninagang as Jesus ya ilek-ña nu siha: en tingo’ na ayu i manmanafanmå’gas gi Gentiles, ha fa’tinas mina’gas gi hilo’-ñiha; ya i manmå’gas, ha fa’tinas nina’siña gi hilo’-ñiha.
43 Lao ti u taiguennao giya hamyo; sa’ håyi i malago’ dumångkolo giya hamyo; guiya u fañeñetbe.
44 Ya håyi giya hamyo i malago’ mumå’gas; u tentågo’ para todu.
45 Sa’ magåhet ni’ i Lahen taotao ti måtto para u masetbe, lao para u fañetbe, ya para u fannå’i i ha’ani-ña ni un reskåti para u na’fanlibri meggai.
46 Ya manmåtto Jerico. Ya annai manhånao gi Jerico, yan i disipulu-ña yan un dångkolon linahyan taotao, si Bartimeo låhen Timeo, na båchet, matåta’chong gi uriyan chålan, ya umégagao.
47 Ya annai ha hungok na si Jesus Nasareno, ha tutuhon umågang ilek-ña: Jesus, Låhen David, gái’ase’ nu guåhu.
48 Ya meggai mumomye para u famatkilu: lao mås umågang gosa’gang: Hågu ni’ i Lahen David, gái’ase’ nu guåhu.
49 Ya si Jesus tumohge ya ilek-ña: Ågang gui’. Ya ma ågang i bachet ilek-ñiha nu guiya: Magof hao; kahulo’ sa’ iná’agang hao.
50 Ya ha na’suha i kapå-ña, kahulo’, ya malak as Jesus.
51 Ya si Jesus manoppe gui’ ya ilek-ña: Håfa malago’-mu hu fa’tinas giya hågu? I bachet ilek-ña nu guiya: Raboni, na’fanli’e’ yu’.
52 Si Jesus ilek-ña: Hånao, i hinengge-mu muna’homlo’ hao. Ya ensigidas manli’e’, ya ha dálalak si Jesus gi hinanao-ña.
Put fabót, leave a comment or ask a question below.