CAPITULO 7
1 YA mandaña guiya güiya y Fariseo sija, yan palo gui escriba sija ni manmato guine Jerusalem,
2 Ya malie palo gui disipuluña na mañochocho pan yan áplacha na canae, ni comequeilegña na pot ti jafagase.
3 Sa y Fariseo sija, yan toda y Judio sija, jaadadaje y tradision manamco sija, yaguin megae nae ti jafagase y canaeñija, ti ufañocho.
4 Ya anae manmato guine y metcado, yaguin ti jafagase sija, ti ufañocho; yan megae sija na güinaja rinesibeñija para ujaadaje, parejoja yan mafagase y copa sija, yan y jara sija, yan y bason coble sija.
5 Ya mafaesen ni Fariseo sija yan y escriba sija: Jafa y disipulumo sija na ti manmamómocat taemano y tradision manamco sija; mañochochoja pan yan aplacha y canaeñija?
6 Ya ilegña nu sija: Hipocrita jamyo; mauleg sinanganña si Isaias, ni y esta matugue: Este sija na taotao y labiosñija nae maonrayo, lao y corasonñija chago guiya guajo.
7 Lao taebale jaadorayo, manmamananagüe ni finanagüe ni tinago taotao sija.
8 Sa inpelo jamyo y tinago Yuus, ya mantietiene fitme y tradision taotao sija: (ni y mafagase y jara sija, yan y copa sija, yan infatinas megae sija na güinaja parejo yan este.)
9 Ya ilegña nu sija: Magajet jamyo yumute y tinago Yuus para inadaje y tradisionmiyo.
10 Sa si Moises ilegña: Onra si tatamo yan si nanamo; ya y mumatdise y tata pat y nana, seguro na umatae.
11 Lao jamyo ilegmiyo: Yaguin y taotao ilegña ni tataña pat nanaña: Y Cotban (cumequeilegña y ninae) na jago umaprobecha pot guajo, güiya sumaga libre.
12 Ya inpelo güe na ufatinas taya para si tataña pat si nanaña;
13 Inrechasa y sinangan Yuus ni ninaenmiyo na tradision; yan megae sija na güinaja finatinasmiyo parejo yan este.
14 Ya jaagang talo guiya güiya todo y linajyan taotao ya ilegña: Ecungog jamyo todos, ya intingo.
15 Taya gui sumanjiyong gui taotao ni y janajalom, siña numataelaye, lao y janajujuyong gui jinalomña, ayo sija munatataelaye y taotao
16 (Yaguin guaja gaetalanga para ufanjungog, uecungog)
17 Ya anae jumalom gui guima, jadingo y linajyan taotao, y disipuluña sija mafaesen güe ni acomparasion.
18 Ya ilegña nu sija: Taegüenaja jamyo locue manaetiningo? Ti intingo na todo y guine jiyong ni jumajalom y taotao ti siña ninataelaye?
19 Sa ti jumajalom gui corasonña na y tiyanña ya malolofan gui secreto; taegüenao janagasgas todo y nengcano.
20 Yan ilegña: Y jumujuyong gui taotao, ayo munatataelaye y taotao.
21 Sa y gui jinalomña gui corason y taotao sija nae, manjujuyong y manaelaye na jinaso sija, y manadulterio, y manábale yan y manpegno,
22 Y mañaque sija, y manlatga, y manaelaye, y dinague, y inábale, y taelaye na atadog, y chinatfino contra si Yuus, y sobetbio, y bababa:
23 Todo este sija na tinaelaye, manguine jalom ya janatataelaye y taotao.
24 Ya cajulo güije, mapos para y oriyan Tiro yan Sidon; ya jumalom gui guima, malagoña na taya utiningo; lao ti siña unatog.
25 Sa jajungog masasangan güe un palaoan na y diquique na jagaña, guaja un áplacha na espiritu, mato ya jatomba güe gui adengña:
26 Ya y palaoan Griega, gui tano Sirofenisa, y tinayuyut güe na uyute juyong gui jagaña y anite.
27 Lao ilegña nu guiya: Polo finena ya ufanjaspog y famaguon sija; sa ti mauleg machule y pan y famaguon, ya ufanmayotte y galago sija.
28 Ya manope y palaoan, ilegña: Junggan, Señot; lao y galago sija, gui papa lamasa, jacacanoja y andesmoronan y famaguon sija.
29 Ayo nae ilegña ni palaoan: Pot este na sinangan, janao y anite jumanao gui jagamo.
30 Ya anae jumanao para iyasija, jasoda na y jagaña umaason gui jilo cama, ya y anite esta jumanao.
31 Ya tumalo jumanao gui oriyan Tiro yan malofan guiya Sidon, ya mato gui tasen Galilea; ya malofan gui entalo y oriyan Decapolis.
32 Ya maconie güe un tanga ya udo, ya matayuyut güe na upolo y canaeña gui jiloña.
33 Ya janasajnge güe gui linajyan taotao, ya japolo y calolotña gui talangan y tanga, ya tumola ya japacha y jilaña;
34 Ya jaatan julo y langet sumospiros, ya ilegña: Efatha, cumequeilegña, mababa!
35 Ya mababa y talangaña; ya mapula y gumogode y jilaña, ya cumuentos mauleg.
36 Ya jaencatga sija, na chañija sumangangane ni jaye; lao mientras mas jaencatga, mas manamamto;
37 Ya ninafangosmanman, ilegñija: Mauleg finatinasña todo: janafanmanjungog y mananga, ya y manudo janafanguentos.
KAPÍTULU 7
1 Ya mandanña’ giya guiya i Fariseho siha, yan palu gi eskriba siha ni manmåtto ginen Jerusalem,
2 Ya mali’e’ palu gi disipulu-ña na mañóchocho pån yan áplacha’ na kånnai, ni kuméke’ilek-ña na put ti ha fa’gåsi.
3 Sa’ i Fariseho siha, yan todu i Judiho siha, ha adádahi i tradisión manåmko’ siha, yanggen meggai nai ti ha fa’gåsi i kannai-ñiha, ti u fañocho.
4 Ya annai manmåtto guini i metkådo, yanggen ti ha fa’gåsi siha, ti u fañocho; yan meggai siha na guinaha rinesiben-ñiha para uha adahi, parehu ha’ yan ma fa’gåsi i kopa siha, yan i hara siha, yan i båson kopble siha.
5 Ya mafaisen ni Fariseho siha yan i eskriba siha: Håfa i disipulu-mu siha na ti manmamómokkat taimanu i tradisión manåmko’ siha; mañochocho ha’ pån yan áplacha’ i kannai-ñiha?
6 Ya ilek-ña nu siha: Hipokrita hamyo; maolek sinangån-ña si Isaias, ni’ i esta matuge’: Este siha na taotao i labios-ñiha nai ma onra yu’, lao i kurason-ñiha chågo’ giya guåhu.
7 Lao táibali ha adora yu’, manmama’nåna’gue ni fina’nå’gue ni tinago’ taotao siha.
8 Sa’ in pe’lo hamyo i tinago’ Yu’os, ya mantiétieni fitme i tradisión taotao siha: (ni i ma fa’gåsi i håra siha, yan i kopa siha, yan in fa’tinas meggai siha na guinaha parehu yan este.)
9 Ya ilek-ña nu siha: Magåhet hamyo yumute’ i tinago’ Yu’os para en adahi i tradision-miyu.
10 Sa’ si Moisés ilek-ña: Onra si tatå-mu yan si nanå-mu; ya i mumatdisi i tata pat i nana, siguru na u måtai.
11 Lao hamyo ilek-miyu: Yanggen i taotao ilek-ña ni tatå-ña pat nanå-ña: I Kotban (kuméke’ilek-ña i nina’i) na hågu umaprobecha put guåhu, guiya sumåga libri.
12 Ya in pe’lo gui’ na u fa’tinas tåya’ para si tatå-ña pat si nanå-ña;
13 En richåsa i sinangan Yu’os ni nina’en-miyu na tradisión; yan meggai siha na guinaha fina’tinas-miyu parehu yan este.
14 Ya ha ågang ta’lo giya guiya todu i linahyan taotao ya ilek-ña: Ékungok hamyo todus, ya en tingo’.
15 Tåya’ gi suménhiyong gi taotao ni’ i ha na’hålom, siña numa’táilayi, lao i ha na’húhuyong gi hinalom-ña, ayu siha muna’tátailayi i taotao.
16 (Yanggen guaha gáitalanga para u fanhungok, u ékungok).
17 Ya annai humålom gi gima’, ha dingu i linahyan taotao, i disipulu-ña siha ma faisen gui’ ni akomparasión.
18 Ya ilek-ña nu siha: Taiguennao ha’ hamyo lokkue’ manáitiningo’? Ti en tingo’ na todu i ginen hiyong ni humåhalom i taotao ti siña nina’táilayi?
19 Sa’ ti humåhalom gi kurason-ña na i tiyån-ña ya malóloffan gi sikretu; taiguennao ha na’gåsgas todu i néngkanno’.
20 Yan ilek-ña: I humúhuyong gi taotao, ayu muna’tátailayi i taotao.
21 Sa’ i gi hinalom-ña gi kurason i taotao siha nai, manhúhuyong i manáilayi na hinasso siha, i manadutterio, i manábale yan i mampegno,
22 I mañåki siha, i manlåtga, i manailayi, i dinagi, i inábali, i táilayi na attadok, i chinátfino’ kontra si Yu’os, i subetbiu, i båbaba:
23 Todu este siha na tináilaye, mangginen hålom ya ha na’tátailayi i taotao.
24 Ya kahulo’ guihi, må’pos para i uriyan Tiro yan Sidon; ya humålom gi gima’, malago’-ña na tåya’ u tiningo’; lao ti siña umatok.
25 Sa’ ha hungok ma sásangan gui’ un palao’an na i dikike’ na hagå-ña, guaha un áplacha’ na espiritu, måtto ya ha tomba gui’ gi addeng-ña:
26 Ya i palao’an Griega, gi tano’ Sirofenisa, i tináyuyut gui’ na u yute’ huyong gi hagå-ña i aniti.
27 Lao ilek-ña nu guiya: Po’lo fine’na ya u fanhåspok i famagu’on siha; sa’ ti maolek machule’ i pån i famagu’on, ya u fanmayotte i ga’lågu siha.
28 Ya manoppe i palao’an, ilek-ña: Hunggan, Siñot; lao i ga’lågu siha, gi papa’ lamasa, ha kåkanno’ ha’ i andesmoronan i famagu’on siha.
29 Ayu nai ilek-ña ni palao’an: Put este na sinangan, hånao, i aniti humånao gi hagå-mu. 30 Ya annai humånao para iya siha, ha sodda’ na i hagå-ña umå’asson gi hilo’ kåma, ya i aniti esta humånao.
31 Ya tuma’lo humånao gi uriyan Tiro yan maloffan giya Sidon, ya måtto gi tasen Galilea; ya maloffan gi entalo’ i uriyan Decapolis.
32 Ya makonne’i gui’ un tangnga ya udu, ya ma tåyuyut gui’ na u po’lo i kannai-ña gi hilo’-ña.
33 Ya ha na’sahnge gui’ gi linahyan taotao, ya ha po’lo i kalulot-ña gi talangan i tangnga, ya tumo’la’ ya ha pacha i hila’-ña;
34 Ya ha atan hulo’ i langet sumosperos, ya ilek-ña: Efatha, kuméke’ilek-ña, mababa!
35 Ya mababa i talanga-ña; ya mapula i gumógodde i hila’-ña, ya kumuentos maolek.
36 Ya ha enkåtga siha, na cha’-ñiha sumangångani ni håyi; lao mientras mås ha enkåtga, mås ma na’måmto;
37 Ya nina’fangosmanman, ilek-ñiha: Maolek fina’tinås-ña todu: ha na’fanmanhungok i manangnga, ya i manudu ha na’ fanguentos.
Put fabót, leave a comment or ask a question below.