CHamoru Gospel of Mark from Y Santa Biblia (1908) aligned with Utugrafihan CHamoru (Guåhan).

CAPITULO 16
1 YA anae esta malofan y sabado, si Maria Magdalena, yan si Maria nanan Santiago, yan si Salome, manmamajan paopao, para ufato ya umapalalae güe.
2 Ya taftataf gui egaan, gui finenana na jaane gui semana, manmato gui naftan gui quinajulo y atdao.
3 Ya ilegñija entre sija: Jaye uninagalileg y acho gui pettan y naftan?
4 Ya anae maaatan, malie na esta managalileg y acho, sa gosdangculo.
5 Ya manjalom gui naftan, malie un patgon na taotao, na matatachong gui agapa na banda, minagagon apaca na anaco; ya ninafangosmaañao.
6 Ya ilegña nu sija: Chamiyo fanmaaañao: inaliligao si Jesus Nasareno, ni y maatane gui quiluus: esta cajulo; taegüe güine; liija y lugat anae mapopolo güe.
7 Janao infanjanao, ya insangane y disipuluña, yan si Pedro: Güiya jumanao gui menanmiyo guiya Galilea; ayo nae inlie güe, ni y guinin mansinangane jamyo.
8 Ya manmapos juyong, ya manmalago gui naftan, sa jumuyong manlalaolao yan manmanman; ya ti ufanmanangane jafa ni y taotao; sa mangosmanmaañao.
9 Lao anae cajulo si Jesus, taftataf gui egaan gui finenana na jaane gui semana, umalie finena, yan Maria Magdalena, ni y guinin janajuyong siete na anite.
10 Ya mapos güe, ya jasangane ayo y guinin mangachochongña, ni y mantriste, yan manatanges.
11 Ya sija, anae jajungog na esta lâlâ ya umalie yan Mana, ti majonggue.
12 Ya anae manmalofan estesija, manmalie talo yan dos, lao otro jechuraña; gui anae manjajanao gui fangualuan.
13 Ya manmapos, ya manmasangane y palo disipulo: lao ti majonggue.
14 Despues di ayo, manmalie yan y onse gui anae mañochocho, ya jalalatde ni y ti manjengguenñija, yan y majetog corasonñija, sa ti majonggue ayo sija y lumie güe despues di cumajulo.
15 Ya ilegña nu sija; Janao fanmalag todo y tano, ya predica y ibangelio todo y ninajuyong sija.
16 Jaye y manjonggue ya matagpange, usatba; lao ayo y ti manjonggue; umasentensia.
17 Ya este sija na señat ufantinattitiye ayo sija y manmanjonggue: Pot y naanjo ujayute juyong y anite sija; ufanguentos ni y nuebo na finijo;
18 Ufanmangajat culebla sija, ya, yanguin manguimen jafa na beneno; ti uninafanlamen: ya ujapolo y canaeñija gui manmalango sija, ya ujanafanjomlo.
19 Enao y Señot, despues di mansinangane sija, rinisibe ni y langet, ya matachong gui agapa Yuus.
20 Ya manmapos, ya mapredica y sinangan gui todo y lugat, mañisija manmachocho yan y Señot, ya manafitme y sinangan ni y umatitiye na señat. Amen.

KAPÍTULU 16
1 Ya annai esta maloffan i såbadu, si Maria Magdalena, yan si Maria nånan Santiago, yan si Salomé, manmamåhan påopao, para u fåtto ya umapalala’i gui’.
2 Ya tåftataf gi egga’an, gi fine’nana na ha’åni gi simåna, manmåtto gi naftan gi kinahulo’ i atdao.
3 Ya ilek-ñiha entre siha: Håyi u nina’gálilek i acho’ gi pettan i naftan?
4 Ya annai ma’á’atan, mali’e’ na esta mana’gálilek i acho’, sa’ gosdångkolo.
5 Ya manhålom gi naftan, mali’e’ un påtgon na tåotao, na matåta’chong gi agapa’ na bånda, minagågon å’paka’ na anåkko’; ya nina’fangosma’å’ñao.
6 Ya ilek-ña nu siha: Cha’-miyu fanma’å’a’ñao: en alíligao si Jesus Nasareno, ni’ i ma’atåni gi kilu’os: esta kahulo’; taigui guini; li’e’ ha’ i lugåt annai mapópo’lo gui’.
7 Hånao in fan hånao, ya in sangåni i disipulu-ña, yan si Pedro: Guiya humånao gi me’nan-miyu giya Galilea; ayu nai in li’e’ gui’, ni’ i ginen mansinangåne hamyo.
8 Ya manmå’pos huyong, ya manmalågu gi naftan, sa’ humuyong manlålaolao yan manmanman; ya ti u fanmañangåni håfa ni’ i taotao; sa’ mangosmanma’å’ñao.
9 Lao annai kahulo’ si Jesus, tåftataf gi egga’an gi fine’nana na ha’åni gi simåna, umali’e’ fine’na, yan Maria Magdalena, ni’ i ginen ha na’huyong siette na aniti.
10 Ya må’pos gui’, ya ha sångåni ayu i ginen mangga’chóchong-ña, ni’ i mantriste, yan manåtanges.
11 Ya siha, annai ha hungok na esta lå’la’ ya umali’e’ yan Maria, ti ma hongge.
12 Ya annai manmaloffan este siha, manmali’e’ ta’lo yan dos, lao otro hechurå-ña; gi annai manhåhanao gi fangualu’an.
13 Ya manmå’pos, ya manmasangåni i palu disipulu: lao ti mahongge.
14 Despues di ayu, manmali’e’ yan i onse gi annai mañóchocho, ya ha lalåtde ni’ i ti manhenggen-ñiha, yan i mahetok kurason-ñiha, sa’ ti ma hongge ayu siha i lumi’e’ gui’ despues di kumahulo’.
15 Ya ilek-ña nu siha; Hånao fanmalak todu i tano’, ya predika i ebanghelio todu i nina’huyong siha.
16 Håyi i manhongge ya matakpångi, u såtba; lao ayu i ti manhongge; u masentensia.
17 Ya este siha na siñåt u fantinattítiyi ayu siha i manmanhongge: Put i na’ån-hu u ha yute’ huyong i aniti siha; u fanguentos ni’ i nuebu na fino’-hu;
18 U fanmangåhat kulepbla siha, ya, yanggen manggimen håfa na binenu, ti u nina’fanlåmen: ya u ha po’lo i kannai-ñiha gi manmalångu siha, ya u ha na’fanhomlo’.
19 Ennao i Siñot, despues di mansinangåni siha, rinisibe ni’ i langet, ya matå’chong gi agapa’ Yu’os.
20 Ya manmå’pos, ya ma predika i sinangan gi todu i lugåt, mañisiha manmacho’cho’ yan i Siñot, ya ma na’fitme i sinangan ni’ i umatíttiyi na siñåt. Amén.