CAPITULO 11
1 Y A anae esta manjijijot Jerusalem, yan Betfage, yan Betania, gui egso Olibo, jatago dos gui disipuluña,
2 Ya ilegña nu sija: Janao fanmalag y sengsong gui menanmiyo: ya enseguidas qui manjalom jamyo, inseda un patgon bulico, na magogode, na taya nae matachonge; pila ya inquene mague.
3 Ya yanguin jaye na taotao umalog nu jamyo; Jafa na infatinas este? Sangane: Señot janesesita: ya enseguidas umanajanao mague.
4 Ya manmapos, ya masoda nu patgon bulico gui caye na magogode gui jiyong potta ya mapula güe.
5 Ya palo ni y mangaegue güije ilegñija nu sija: Jafa na inpila enao y patgon bulico?
6 Ya masangane jaftaemano y mansinangane as Jesus: ya japolo na ufanjanao.
7 Ya macone guato y patgon bulico gui as Jesus, ya japolo magagoñija güi jiloña ya maudae si Jesus.
8 Ya megae jajuto magagoñija gui chalan: yan palo y ramas jayo na manmanuutot gui fangualuan.
9 Ya ayo sija y manmofona gui menaña, yan y madalalag gui tatteña, manaagang ilegñija: Hosana; Bendito ayo y mato pot y naan y Señot:
10 Bendito y raeno na mamamaela, y raenon y tatata as David, Hosana guiyajululu.
11 Ya si Jesus jumalom Jerusalem, ya jumalom gui templo; ya anae munjayan jalie todo y güinaja, ya y pupuenge, mapos yan y dose, manmalag Betania.
12 Ya y inagpaña anae manmato guinen Betania, ñalang.
13 Ya anae jalie mona un trongcon igos na gagaejagonja, malag ayo jinasoña na ufañoda jafa; lao anae mato guato, taya sinedaña na jagonja; sa ti tiempopoña y igos trabia.
14 Ayonae manope ya ilegña nu güiya: Taya ni un taotao uquinano y tinegchamo para siempre. Ya majungog ni y disipuluña.
15 Ya manmato Jerusalem; ya jumalom y templo, ya sigue di jayute juyong todo ayo sija y manmanbebende, yan y manmamamajan gui templo, yan janafanalinquin y lamasan salape y manmanulalaeca, yan y tachong y man manbebende paluma:
16 Ya taya ni uno jaconsiente na ufañule baso gui templo.
17 Ya mamanagüe, ilegña nu sija: Ada ti matugue na y guimajo umafanaan guma manaetae ni y todo nasion sija? lao jamyo fumatinas y liyang mañañaque.
18 Ya majungog ni y magas mamale yan y escriba sija, ya maaliligao jaftaemano para umapuno; sa mamaañao nu güiya, sa janafanmamanman y linajyan taotao ni y finanagüeña.
19 Ya cada pupuenge, jumanao juyong gui siuda.
20 Ya y egaan anae manmalolofan, malie y trongcon igos na anglo desde y jale.
21 Ayonae jajaso si Pedro ya ilegña nu güiya: Rabi, estagüe y trongcon igos ni y unmatdise na anglo todo.
22 Ya manope si Jesus ilegña nu sija: Jenggue si Yuus.
23 Sa magajet jusangane jamyo: Jayeja y umalog ni este y egso, janao ya unyutejao gui tase; ya ti bumuebuente gui corasonña, lao jajonggue na umafatinas ayo y sinanganña; uguaja.
24 Enaomina jusangane jamyo: Na todo sija ingagao, anae manmanaetae jamyo, jenggue na esta inresibe, ya infanmannae.
25 Ya an manojgue ya mananaetaejamyo, asie yanguin guajajao jafa contra jaye; sa y Tatanmiyo locue ni y gaegue gui langet, uninasie ni y isaomiyo.
26 Lao yanguin ti manasiijamyo, y Tatanmiyo ni y gaegue gui langet ti uninasie ni y isaomiyo.
27 Ya manmato talo Jerusalem, ya anae mamomocat gui templo, manmato y magas mamale, yan y escriba, yan y manamco sija;
28 Ya ilegñija nu güiya: Pot jafa na ninasiña na unfatitinas estesija? yan jayejao numae ni este na ninasiña, para unfatinas estesija?
29 Ya si Jesus ilegña nu sija: Bae jufaesen locue jamyo un finaesen ya inepeyo, ayonae jusangane jamyo pot jafa na ninasiña na jufatitinas este sija.
30 Y tinagpangen Juan, guinen y langet, pat guinen y taotao sija? epeyo.
31 Ya jajajaso gui sumanjalomñija, ilegñija: Yanguin ilegmame, Guinen y langet; ualog: Jafanae na ti injenggue güe?
32 Yanguin ilegmame guinen y taotao sija—manmaañao ni y taotao, sa pineloñija todo na magajet na profeta si Juan.
33 Ya manmanope, ilegñija as Jesus: Ti intingo. Ayonae si Jesus ilegña nu sija; ni guajo locue ti jusangane jamyo pot jafa naninasiña, na jufatitinas estesija.
KAPÍTULU 11
I Ya annai esta manhíhihot Jerusalem, yan Betfage, yan Betania, gi ekso’ Olibo, ha tågo’ dos gi disipulu-ña,
2 Ya ilek-ña nu siha: Hånao fanmalak i sengsong gi me’nan-miyu: ya ensigidas ki manhålom hamyo, insedda’ un påtgon buliku, na magógodde, na tåya’ nai mata’chongi; pila’ ya en kenne’ mågi.
3 Ya yanggen håyi na taotao umålok nu hamyo; Håfa na in fa’tinas este? Sangåni: Siñot ha nisisita: ya ensigidas u mana’hånao mågi.
4 Ya manmå’pos, ya ma sodda’ un påtgon buliku gi kåyi na magógodde gi hiyong potta ya ma pula’ gui’.
5 Ya palu ni’ i manggaige guihi ilek-ñiha nu siha: Håfa na en pila’ ennao i patgon buliku?
6 Ya ma sangåni haftaimanu i mansinangåni as Jesus: ya ha po’lo na u fanhånao.
7 Ya ma konne’ guatu i patgon buliku gi as Jesus, ya ha po’lo magågon-ñiha gi hilo’-ña ya ma’udai si Jesus.
8 Ya meggai ha huto’ magågon-ñiha gi chalan: yan palu i ramas håyu na manmanú’utot gi fangualu’an.
9 Ya ayu siha i manmófo’na gi me’nå-ña, yan i ma dálalak gi tatte-ña, mana’a’gang ilek-ñiha: Hosana; Bendito ayu i måtto put i na’an i Siñot:
10 Bendito i raino na mámamaila’, i rainon i tatå-ta as David, Hosana giya húlulu’.
11 Ya si Jesus humålom Jerusalem, ya humålom gi templo; ya annai monhåyan ha li’e’ todu i guinaha, ya i pupuengi, må’pos yan i dosse, manmalak Betania.
12 Ya i inakpå’-ña annai manmåtto ginen Betania, ñålang.
13 Ya annai ha li’e’ mo’na un trongkon igos na gágaihagon ha’, malak ayu hinasso-ña na u fañodda’ håfa; lao annai måtto guatu, tåya’ sinedda’-ña na hågon ha’; sa’ ti tiempópo-ña i igos trabiha.
14 Ayu nai manoppe ya ilek-ña nu guiya: Tåya’ ni un taotao u kinanno’ i tinekchå’-mu para siempre. Ya mahungok ni’ i disipulu-ña.
15 Ya manmåtto Jerusalem; ya humålom i templo, ya sigi di ha yute’ huyong todu ayu siha i manmanbébende, yan i manmamåmahan gi templo, yan ha na’fanalengken i lamasan salåppe’ i manmanulálaika, yan i ta’chong i manmambébende paluma:
16 Ya tåya’ ni unu ha konsiente na u fañule’ båsu gi templo.
17 Ya mama’nå’gue, ilek-ña nu siha: Ada ti matuge’ na i gimå-hu u mafa’na’an guma’ manaitai ni’ i todu nasión siha? Lao hamyo fuma’tinas i liyang mañañake.
18 Ya mahungok ni’ i ma’gas mamåle’ yan i eskriba siha, ya ma alíligao haftaimanu para u ma puno’; sa’ manma’å’ñao nu guiya, sa’ ha na’fanmámanman i linahyan taotao ni’ i fina’nå’gue-ña.
19 Ya kada pupuengi, humånao huyong gi siudá.
20 Ya i egga’an annai manmalóloffan, mali’e’ i trongkon igos na ånglo’ desde i hale’.
21 Ayu nai ha hasso si Pedro ya ilek-ña nu guiya: Rabi, éstague’ i trongkon igos ni’ i un matdisi na ånglo’ todu.
22 Ya manoppe si Jesus ilek-ña nu siha: Hengge si Yu’os.
23 Sa’ magåhet hu sangåni hamyo: Håyi ha’ i umålok ni este i ekso’, hånao ya un yute’ hao gi tasi; ya ti bumuébuente gi kurason-ña, lao ha hongge na u mafa’tinas ayu i sinangån-ña; u guaha.
24 Ennao mina’ hu sangåni hamyo: Na todu siha in gågao, annai manmanaitai hamyo, hengge na esta en resibi, ya in fanmanå’i.
25 Ya an manohge ya manánaitai hamyo, asi’e yanggen guaha hao håfa kontra håyi; sa’ i Tatan-miyu lokkue’ ni’ i gaige gi langet, un inasi’e ni’ i isao-miyu.
26 Lao yanggen ti manasi’e hamyo, i Tatan-miyu ni’ i gaige gi langet ti un inasi’e ni’ i isao-miyu.
27 Ya manmåtto ta’lo Jerusalem, ya annai mamómokkat gi templo, manmåtto i ma’gas mamåle’, yan i eskriba, yan i manåmko’ siha;
28 Ya ilek-ñiha nu guiya: Put håfa na nina’siña na un fa’títinas este siha? Yan håyi hao numå’i ni este na nina’siña, para un fa’tinas este siha?
29 Ya si Jesus ilek-ña nu siha: Bai hu faisen lokkue’ hamyo un finaisen ya en eppe yu’, ayu nai hu sangåni hamyo put håfa na nina’siña na hu fa’títinas este siha.
30 I tinakpången Juan, ginen i langet, pat ginen i taotao siha? Eppe yu’.
31 Ya ha háhasso gi suménhalom-ñiha, ilek-ñiha: Yanggen ilek-måmi, Ginen i langet; u ålok: Håfa nai na ti en hengge gui’?
32 Yanggen ilek-måmi ginen i taotao siha—manma’å’ñao ni’ i taotao, sa’ pine’lon-ñiha todu na magåhet na profeta si Juan.
33 Ya manmanoppe, ilek-ñiha as Jesus: Ti en tingo’. Ayu nai si Jesus ilek-ña nu siha; Ni guåhu lokkue’ ti hu sangåni hamyo put håfa na nina’siña, na hu fa’títinas este siha.
Put fabót, leave a comment or ask a question below.