CAPITULO 14
1 GUAJA dos na jaane antes di guipot y pascua yan y taelibadura na pan: ya y magas mamale sija, yan y escriba sija, maaliligao jaftaemano para umafababa, ya umacone, ya umapuno.
2 Lao ilegñija: Munga gui guipot na jaane, sa noseaja uguaja atboroto ni y taotao sija.
3 Ya anae estaba guiya Betania, gui guima Simon y ategtog, ya matachong gui lamasa para uchocho; mato un palaoan mañuñule un alabastro na boteyan inggüenten puro nardo, na gosguaguan; ya mafag y boteya, ya jachuda gui jilo y ilon Jesus.
4 Ya guaja sija ninafanbubo sanjalomñija, ya ilegñija: Jafa este na inggüente na manalalastimaja?
5 Maulegña umabende pot tresientos peseta, ya ufanmanae y mamobble: ya malalatde y palaoan.
6 Lao si Jesus ilegña: Pologüe namaesa. Jafaja na inatbororota güe? Mauleg finatinasña nu guajo.
7 Sa manjajamyoja yan y mamobble siempre; ya ngaeanja nae manmalago jamyo, infatinasja mauleg guiya sija: lao guajo ti tafanjijitaja siempre.
8 Güiya jafatinas taemanoja y ninasiñaña: güiya mato antes, para uinggüentiye y tataotaojo, para y naftan.
9 Magajet jusangane jamyo: Manoja este na ebangelio nae mapredica, gui todo y tano, este locue y finatinasña umasangan, para memoriasña.
10 Ya si Judas Iscariote, uno gui dose, mapos malag y magas mamale, para umentrega güe guiya sija.
11 Ya anae majungog, ninafansenmagof, ya mapromete manae güe salape. Ya jaaliligao jaftaemano para uinentrega.
12 Ya y finenana na jaane y taelibadura na pan, anae maofrese y pascua, y disipuluña ilegñija nu güiya; Manojam malagomo guato ya infamauleg nae para unchocho gui pascua?
13 Ya jatago y dos gui disipuluña, ya ilegña nu sija: Janao fanmalag y siuda, sa infanasoda güije yan un taotao na mangangatga un jarran janom: dalalag güe.
14 Ya amanoja nae jumalom, alog ni y taotao guma: Y Maestro, ilegña: Mangue y aposento ni y anae para infañocho gui pascua yan y disipulujo?
15 Ya güiya infanfinanue un dangculo na cuatto; esta mafamauleg yan listo; ayo nae famauleg para jita.
16 Ya y disipuluña sija manmapos, ya manmato gui siuda, ya jasoda jaftaemano y mansinangane sija: ya mafamauleg para y pascua.
17 Ya y pupuenge mato yan y dose.
18 Ya anae manmatatachong ya mañochocho, si Jesus ilegña: Magajet jusangane jamyo: Uno guiya jamyo umentregayo; güiyaja uchumocho yan guajo.
19 Ayo nae ninafangostriste, ya ilegñija nu güiya uno yan otro: Guajo? y otro ilegña: Guajo?
20 Ayo nae manope ilegña nu sija: Uno gui dose ni y jumajame manotche gui tason.
21 Y Lajin taotao magajet na mapos, ni y esta matugue pot güiya: lao namaase ayo na taotao ni y jaentrega y Lajin taotao. Maulegña ayo na taotao na ti umafañago.
22 Ya anae mañochocho, jachule si Jesus y pan, ya jabendise, ya jaipe, ya janae sija, ilegña: Chile ya incano, sa este y tataotaojo.
23 Ya jachule y posuelo, ya anae munjayan janae grasia, janae sija: ya todos manguimen.
24 Ya ilegña nu sija: Este y jâgâjo, gui nuebo na testamento, ni machuda pot y megae.
25 Magajet jusangane jamyo, na ti juguimen talo ni y tinegcha ubas, asta ayo na jaane, na juguimen nuebo gui raenon Yuus.
26 Ya anae munjayan macanta un himno, manmapos manmalag y finabeca Olibo.
27 Ya si Jesus ilegña nu sija: Todos jamyo infaninefende pot guajo; sa esta matugue: Bae jupanag y pastot, ya y quinilo sija ufanmachalapon.
28 Lao despues di lâlâyo talo, ya cumajuloyo, jujanao esta y menanmiyo guiya Galilea.
29 Ayo nae si Pedro ilegña: Achogja todos maninefende; lao guajo aje.
30 Ya sinangane as Jesus ilegña: Magajet jusanganejao na jago pagoja na puenge, antes qui uoo dos biaje y gayo, unpuneyo tres biaje.
31 Lao guiya janaguefchadeg y cuentosña, ilegña: Yanguin jumitamatae, ti jupunejao ni jaftaemano. Taegüineja locue sinanganñija todos.
32 Ya manmato un lugat na y naaña Gethsemane: ya ilegña ni y disipuluña sija: Fanmatatachong güine, mientras mananaetaeyo.
33 Ya jacone gachongña si Pedro, yan si Santiago, yan si Juan, ya jatutujon manmajalang, yan mangostriste,
34 Ya ilegña nu sija: Y antijo sentriste asta qui jumatae; fañaga güine, ya iafanmamulan.
35 Ya jumanao mona didide, dumimo papa gui jilo oda, ya manaetae, na yanguin siña, ufalofan y ora guiya güiya.
36 Ya ilegña: Abba, Tata: todo y güinaja mansiña para jago; nasuja este y posuelo guiya guajo: lao ti taemanoja minalagojo, na y minalagomo.
37 Ya mato talo guato ya jasoda sija manmaego, ya ilegña as Pedro: Simon mamaegojao? ti siñajao bumela un oraja?
38 Fanbela, yan infanmanaetae; para chamiyo fanjajalom gui tentasion: Y Espiritu magajet na malago; lao y catne echecho.
39 Ya jumanao talo ya manaetae ya ayoja mismo na sinangan.
40 Ya anae tumalo guato jasoda talo sija na manmamaego: sa y atadogñija mangosmacat, ya ti ujatungo jafa umaope güe.
41 Ya mato talo gui mina tres biaje, ya ilegña nu sija: Fanmaego pago, ya infandescansa: esta najong; y ora esta mato; lie y Lajin taotao na maentrega gui canae y manisao sija.
42 Fangajulo ya nije tafanjanao; sa esta y umentregayo jijot.
43 Ya enseguidas, mientras cumuecuentos, mato si Judas, uno gui dose, ya mañisija yan un linajyan taotao, manmañuñule espada, yan galute guinen y magas mamale, yan y escriba, yan y manamco sija.
44 Ya ayo y umentrega güe, mannae señat, ilegña: Jaye y juchico, güiya ayo: guiot ya inquene na seguro.
45 Ya enseguidas nae matogüe, jumajanaoja guato guiya güiya, ya ilegña: Maestro; ya jachico.
46 Ya ayonae mapolo canae sija gui jiloña ya macone.
47 Ya uno guiya sija ni y tumotojgue gui oriya, jalagnos y espadaña, ya jataga y tentago y magas mamale, ya jautut talangaña.
48 Ya manope si Jesus ilegña nu sija: Ada manmato jamyo calang contra y saque, na manmañuñule jamyo espada, yan galute para inguiotyo?
49 Guinen manjijitaja todo y jaane gui templo manmamananagüe, ya ti inquequeneyo? lao mafatinas este para umacumple y tinigue.
50 Ya madingo, ya manmalago todos.
51 Ya dinalalaggüe un patgon na taotao, na jatatampe güe un sábanas, sa taya magagago: ya y mamatgon sija na taotao, maguot güe.
52 Lao güiya japolo y sábanas, ya malago sin magago.
53 Ya macone si Jesus para y magas na pale: ya mandaña y manmagas mamale yan y manamco, yan y escriba sija.
54 Ya si Pedro dinalalag güe, lao chago, asta gui sanjalom, sanjalom y palasyon y magas na pale: ya matachong yan y tentago sija, ya janama maope güe gui guafe.
55 Ya y magas mamale, yan todo y inetnon ofisiat, manmanaliligao testimonio contra si Jesus para umapuno; lao taya masoda.
56 Sa megae manmannae ti manmagajet na testimonio contra güiya: lao y testimonioñija ti manparejo.
57 Ya mangajulo palo ni manmannae contra güiya y testimonio na ti manmagajet, ilegñija:
58 Injingog y ilegña: Juyulang este na templo, ni y mafatinas nu canae, ya y tres na jaane, janacajulo talo otro na ti finatinas canae.
59 Lao este na testimonioñija, locue ti manparejo.
60 Ya y magas na pale tumojgue julo gui talolo, ya jafaesen si Jesus ilegña: Ti unfanope ni jafa? Jafa este sija na testimonioñija contra jago?
61 Lao mamatquiquiloja, taya inepeña. Tumalo y magas na pale finaesen ilegña: Jago si Jesucristo Lajin y Bendito?
62 Ya si Jesus ilegña: Guajo; ya umamaela y tiempo anae inlie y Lajin taotao matatachong gui agapa y gaeninasiña na canae, ya umamaela gui jalom y mapagajes y langet.
63 Ayonae y magas na pale, jatiteg y magaguña, ya ilegña: Para jafajit palo testigo sija?
64 Injingogja y chinatfinoña contra si Yuus: Jafa jinasonmimiyo? Ya todos manmañentensia para umapuno.
65 Ya y palo matutujon matolae, yan matatampe mataña, yan mapatmada, ya ilegñija nu güiya: Profetisa: ya y ofisiat sija rumesibe güe ya japatmada ni y canaeñija.
66 Ya anae si Pedro gaegue gue sanpapa gui palasyo, mato un palaoan tentago y magas na pale:
67 Ya anae jalie si Pedro na janamamaepe güe, jaatan ya ilegña: Jago locue manjajamyo yan si Jesus Nasareno?
68 Lao jadague ilegña: Ti jutungo, ni jutungo jafa ilelegmo. Ya mapos juyong gui cajida; ya umoo y gayo.
69 Ya linie talo ni y palaoan, ya jatutujon sumangane ayo sija y manotojgue gui oriyaña: Este uno guiya sija.
70 Ya jadague talo. Ti apmam ayo y manotojgue gui oriya ilegñija as Pedro: Magajet na jago uno guiya sija? sa jago taotao Galileajao.
71 Lao jatutujon mamatdise yan manjula ya ilegña: Ti jutungo este na taotao y insasangan.
72 Ya enseguidas y mina dos biaje umoo y gayo. Jajaso si Pedro y sinangan, jaftaemano si Jesus nu güiya ilegña: Antes que uoo y gayo dos biaje, undagueyo tres biaje. Ya anae jajaso, tumanges.
KAPÍTULU 14
1 Guaha dos na ha’åni åntes di gipot i pasgua yan i táilebadura na pån: ya i ma’gas mamåle’ siha, yan i eskriba siha, ma’alíligao haftaimanu para u mafa’baba, ya u ma konne’, ya u ma puno’.
2 Lao ilek-ñiha: Mungnga gi gipot na ha’åni, sa’ noseha ha’ u guaha atboroto ni’ i taotao siha.
3 Ya annai eståba giya Betania, gi gima’ Simon i atektok, ya matå’chong gi lamasa para u chocho; måtto un palao’an mañúñule’ un alabåstro na buteyan ingguenten puru nåtdo, na gosguaguan; ya måffak i buteya, ya ha chuda’ gi hilo’ i ilon Jesus.
4 Ya guaha siha nina’fambubu sanhalom-ñiha, ya ilek-ñiha: Håfa este na ingguente na ma na’lålastima ha’?
5 Maolekña u mabende put tres sientos peseta, ya u fanmanå’i i mamopble: ya malalåtde i palao’an.
6 Lao si Jesus ilek-ña: Po’lo gui’ na maisa. Håfa na en atborórota gui’? Maolek fina’tinås-ña nu guåhu.
7 Sa’ manháhamyo ha’ yan i mamopble siempre; ya ngai’an nai manmalago’ hamyo, en fa’tinas ha’ maolek giya siha: lao guåhu ti ta fanhíhita ha’ siempre.
8 Guiya ha fa’tinas taimanu ha’ i nina’siñå-ña: guiya måtto åntes, para u ingguentiyi i tataotao-hu, para i naftan.
9 Magåhet hu sangåni hamyo: månu ha’ este na ebangelio nai mapredika, gi todu i tano’, este lokkue’ i fina’tinås-ña u masångan, para memori’ås-ña.
10 Ya si Judas Iscariote, unu gi dosse, må’pos malak i ma’gas mamåle’, para umentrega gui’ giya siha.
11 Ya annai ma hungok, nina’fansénmagof, ya ma prometi ma nå’i gui’ salåppe’. Ya ha alíligao haftaimanu para u inentrega.
12 Ya i fine’nana na ha’åni i táilebadura na pån, annai ma ofresi i påsgua, i disipulu-ña ilek-ñiha nu guiya; månuham malago’-mu guatu ya infamaolek nai para unchocho gi påsgua?
13 Ya ha tågo’ i dos gi disipulu-ña, ya ilek-ña nu siha: Hånao fanmalak i siudá, sa’ in fanásodda’ guihi yan un taotao na mangångatga un håran hånom: dálalak gui’.
14 Ya amånu ha’ nai humålom, ålok ni’ i taotao guma’: I Ma’estro, ilek-ña: Mångge i aposento ni’ i annai para in fañocho gi påsgua yan i disipulu-hu?
15 Ya guiya en fanfina’nu’i un dångkolo na kuåtto; esta mafa’maolek yan listo; ayu nai fa’maolek para hita.
16 Ya i disipulu-ña siha manmå’pos, ya manmåtto gi siudá, ya ha sodda’ haftaimanu i mansinangåni siha: ya ma fa’maolek para i påsgua.
17 Ya i pupuengi måtto yan i dosse.
18 Ya annai manmatåta’chong ya mañochocho, si Jesus ilek-ña: Magåhet hu sangåni hamyo: Unu giya hamyo umentrega yu’; guiya ha’ u chumocho yan guåhu.
19 Ayu nai nina’fanggostriste, ya ilek-ñiha nu guiya unu yan otro: Guåhu? I otro ilek-ña: Guåhu?
20 Ayu nai manoppe ilek-ña nu siha: Unu gi dosse ni’ i humáhami manotche gi tasón.
21 I Lahen taotao magåhet na må’pos, ni’ i esta matuge’ put guiya: lao ná’ma’ase’ ayu na taotao ni’ i ha entrega i Lahen taotao. Maolekña ayu na taotao na ti u mafañågu.
22 Ya annai mañochocho, ha chule’ si Jesus i pån, ya ha bendisi, ya ha ipe’, ya ha nå’i siha, ilek-ña: Chile’ ya en kånno’, sa’ este i tataotao-hu.
23 Ya ha chule’ i pusuelo, ya annai monhåyan ha nå’i gråsia, ha nå’i siha: ya todus manggimen.
24 Ya ilek-ña nu siha: Este i hagå’-hu, gi nuebu na testamento, ni machuda’ put i meggai.
25 Magåhet hu sangåni hamyo, na ti hu gimen ta’lo ni’ i tinekcha’ ubas, asta ayu na ha’åni, na hu gimen nuebu gi rainon Yu’os.
26 Ya annai monhåyan ma kånta un himno, manmå’pos manmalak i fina’bekka’ Olibo.
27 Ya si Jesus ilek-ña nu siha: Todus hamyo en faninefende put guåhu; sa’ esta matuge’: Bai hu panak i pastót, ya i kinilu siha u fanmachalapon.
28 Lao despues di lå’la’ yu’ ta’lo, ya kumahulo’ yu’, hu hånao esta i me’nan-miyu giya Galilea.
29 Ayu nai si Pedro ilek-ña: Achokka’ todus maninefende; lao guåhu åhe’.
30 Ya sinangåni as Jesus ilek-ña: Magåhet hu sangåni hao na hågu på’go ha’ na puengi, åntes ki u o’o’ dos biåhi i gayu, un puni yu’ tres biåhi.
31 Lao giya ha na’géfchaddek i kuentos-ña, ilek-ña: Yanggen humita måtai, ti hu puni hao ni haftaimanu. Taiguini ha’ lokkue’ sinangan-ñiha todus.
32 Ya manmåtto un lugåt na i na’ån-ña Gethsemane: ya ilek-ña ni’ i disipulu-ña siha: Fanmatåta’chong guini, mientras manánaitai yu’.
33 Ya ha konne’ ga’chong-ña si Pedro, yan si Santiago, yan si Juan, ya ha tutuhon manmahålang, yan manggostriste,
34 Ya ilek-ña nu siha: I anti-hu séntriste asta ki hu måtai; fañåga guini, ya en fanmamulan.
35 Ya humånao mo’na didide’, dumimu påpa’ gi hilo’ odda’, ya manaitai, na yanggen siña, u faloffan i ora giya guiya.
36 Ya ilek-ña: Abba, Tåta: todu i guinaha mansiña para hågu; na’suha este i pusuelo giya guåhu: lao ti taimanu ha’ minalago’-hu, na i minalago’-mu.
37 Ya måtto ta’lo guatu ya ha sodda’ siha manmaigo’, ya ilek-ña as Pedro: Simon mámaigo’ hao? Ti siña hao bumela un ora ha’?
38 Fambela, yan en fanmanaitai; para cha’-miyu fanhåhalom gi tentasión: I Espiritu magåhet na malago’; lao i katne échecho.
39 Ya humånao ta’lo ya manaitai ya ayu ha’ mismo na sinangan.
40 Ya annai tuma’lo guatu ha sodda’ ta’lo siha na manmámaigo’: sa’ i attadok-ñiha manggósmakkat, ya ti u ha tungo’ håfa u ma oppe gui’.
41 Ya måtto ta’lo gi mina’ tres biåhi, ya ilek-ña nu siha: Fanmaigo’ på’go, ya in fandeskånsa: esta nahong; i ora esta måtto; li’e’ i Lahen taotao na ma entrega gi kannai i manisao siha.
42 Fangahulo’ ya nihi ta fanhånao; sa’ esta i umentrega yu’ hihot.
43 Ya ensigidas, mientras kumuékuentos, måtto si Judas, unu gi dosse, ya mañisiha yan un linahyan taotao, manmañuñule’ espåda, yan galuti ginen i ma’gas mamåle’, yan i eskriba, yan i manåmko’ siha.
44 Ya ayu i umentrega gui’, mannå’i siñåt, ilek-ña: Håyi i hu chiku, guiya ayu: gu’ot ya en kenne’ na’siguru.
45 Ya ensigidas nai måtto gui’, humåhanao ha’ guatu giya guiya, ya ilek-ña: Ma’estro; ya ha chiku.
46 Ya ayu nai ma po’lo kannai siha gi hilo’-ña ya ma konne’.
47 Ya unu giya siha ni’ i tumótohge gi uriya, ha laknos i espadå-ña, ya ha tåga’ i tentågo’ i ma’gas mamåle’, ya ha utot talanga-ña.
48 Ya manoppe si Jesus ilek-ña nu siha: Ada manmåtto hamyo kalang kontra i saki, na manmañuñule’ hamyo espåda, yan galuti para en gi’ot yu’?
49 Ginen manhíhita ha’ todu i ha’åni gi templo manmama’nåna’gue, ya ti en kékenne’ yu’? Lao mafa’tinas este para u makumple i tinige’.
50 Ya ma dingu, ya manmalågu todus.
51 Ya dinálalak gui’ un påtgon na taotao, na ha tåtampe gui’ un såbanas, sa’ tåya’ magågagu: ya i mamåtgon siha na taotao, magu’ot gui’.
52 Lao guiya ha po’lo i sabanas, ya malågu sin magågu.
53 Ya ma konne’ si Jesus para i ma’gas na påle’: ya mandanña’ i manmagas mamåle’ yan i manåmko’, yan i eskriba siha.
54 Ya si Pedro dinálalak gui’, lao chågo’, asta gi sanhalom, sanhalom i palåsyon i ma’gas na påle’: ya matå’chong yan i tentågo’ siha, ya ha na’mámaipe gui’ gi guafi.
55 Ya i ma’gas mamåle’, yan todu i inetnon ofisiåt, manmanalíligao testimoniu kontra si Jesus para u ma puno’; lao tåya’ ma sodda’.
56 Sa’ meggai manmannå’i ti manmagåhet na testimoniu kontra guiya: lao i testimonion-ñiha ti mamarehu.
57 Ya mangahulo’ palu ni manmannå’i kontra guiya i testimoniu na ti manmagåhet, ilek-ñiha:
58 In hingok i ilek-ña: Hu yulang este na templo, ni’ i mafa’tinas nu kånnai, ya i tres na ha’åni, ha na’kahulo’ ta’lo otro na ti fina’tinas kånnai.
59 Lao este na testimonion-ñiha, lokkue’ ti mamarehu.
60 Ya i ma’gas na påle’ tumohge hulo’ gi talolo’, ya ha faisen si Jesus ilek-ña: Ti un fanoppe ni håfa? Håfa este siha na testimonion-ñiha kontra hågu?
61 Lao mamatkíkilu ha’, tåya’ ineppe-ña. tuma’lo i ma’gas na påle’ finaisen ilek-ña: Hågu si Jesukristo Låhen i Bendito?
62 Ya si Jesus ilek-ña: Guåhu; ya u mámaila’ i tiempo annai in li’e’ i Lahen taotao matåta’chong gi agapa’ i gái’nina’siña na kånnai, ya u mámaila’ gi halom i mapagåhes i langet.
63 Ayu nai i ma’gas na påle’, ha titek i magagu-ña, ya ilek-ña: Para håfa hit palu testigu siha?
64 En hingok ha’ i chinatfino’-ña kontra si Yu’os: Håfa hinassonmí-miyu? Ya todus manmañentensia para u ma puno’.
65 Ya i palu matutuhon matola’i, yan matåtampe matå-ña, yan ma patmåda, ya ilek-ñiha nu guiya: Profetisa: ya i ofisiåt siha rumesibi gui’ ya ha patmåda ni’ i kannai-ñiha.
66 Ya annai si Pedro gaige gi sampapa’ gi palåsyo, måtto un palao’an tentågo’ i ma’gas na påle’:
67 Ya annai ha li’e’ si Pedro na ha na’mámaipe gui’, ha atan ya ilek-ña: Hågu lokkue’ manháhamyo yan si Jesus Nasareno?
68 Lao ha dagi ilek-ña: Ti hu tungo’, ni hu tungo’ håfa ilélek-mu. Ya må’pos huyong gi kahida; ya umo’o’ i gayu.
69 Ya lini’e’ ta’lo ni’ i palao’an, ya ha tutuhon sumangåni ayu siha i manótohge gi uriyå-ña: Este unu giya siha.
70 Ya ha dagi ta’lo. Ti åpmam ayu i manótohge gi uriya ilek-ñiha as Pedro: Magåhet na hågu unu giya siha? Sa’ hågu taotao Galilea hao.
71 Lao ha tutuhon mamatdisi yan manhula’ ya ilek-ña: Ti hu tungo’ este na taotao i en såsangan.
72 Ya ensigidas i mina’ dos biåhi umo’o’ i gayu’. Ha hasso si Pedro i sinangan, haftaimanu si Jesus nu guiya ilek-ña: Åntes ki u o’o’ i gayu dos biåhi, un dagi yu’ tres biåhi. Ya annai ha hasso, tumånges.
Put fabót, leave a comment or ask a question below.