CAPITULO 9
1 YA ilegña nu sija: Magajet jusangane jamyo, na guaja palo sija ni mangaegue güine na ti ujaguaeya finatae, asta que jalie y raenon Yuus na mato yan ninasiña.
2 Anae esta malofan y sais na jaane, si Jesus jacone si Pedro, yan si Santiago, yan si Juan, janafañajnge sijaja gui un taquilo na ogso; ya jaago güe gui menanñija.
3 Ya y magaguña manmañila, gosapaca calang niebe, taya ni un fafagas gui tano siña munaapaca taegüine.
4 Ya manalie na mato guiya güiya si Elias yan Moises, na manguecuentos yan si Jesus.
5 Ayo nae manope si Pedro, ilegña as Jesus: Maestro mauleg utafañagajit güine, ya tafanmamatinas tres tabetnáculo; para jago y uno, para si Moises y otro, yan para si Elias y otro.
6 Si ti jatungo jafa usangan, sa estaba mangosmaañao.
7 Ya mato un mapagajes y manjineme sija, ya un inagang gui mapagajes, ilegña: Este y güinaeyaco na Lajijo, jingog güe.
8 Ya derepente jaatan gui oriyañija, ti manmanlie ni jaye, na si Jesusja yan sija.
9 Ya anae manunog sija guine y egso, jaencatga sija na chañija sumangangane ni jaye ni liniiñija, asta que y Lajin taotao esta cajulo guine entalo y manmatae.
10 Ya sija jaadaje ayo na sinangan guiya sijaja, manafaesen gui entaloñija: Jafa ayo y cajulo guine entalo y manmatae cumequeilegña.
11 Ya mafaesen güe, ilegñija: Y escriba sija ilegñija, si Elias nesesita ufato finenana.
12 Güiya manope ilegña nu sija: Si Elias magajet nesesita ufato finenana, ya jafatinas talo todo y güinaja: Jafa esta matugue gui Lajin taotao na upadese megae ya manataya guaelayeña?
13 Lao jusangane jamyo na si Elias esta mato ya esta mafatinas guiya güiya todo y malagoñija, taegüine esta matugue nu güiya.
14 Ya anae mato gui disipuluña sija, jalie un dangculon linajyan taotao gui oriyañija, yan y escriba sija ni manafaesen yan sija.
15 Ya enseguidas todo y linajyan taotao, anae malie güe, ninafangosmanman, ya manmalago guato guiya güiya ya masaluda güe.
16 Ya jafaesen sija, ilegña! Jafana manafaesen jamyo yan sija?
17 Ya manope uno gui linajyan taotao, ilegña: Maestro juconie jao mague na lajijo, na guaja un espiritun udo;
18 Ya manoja nae quinene güe, japedadasos; ya bóboan, ya janachechegcheg y nifenña, ya ninayafae; ya jusangane y disipulumo sija, na ujayute juyong, lao ti manasiña.
19 Manope güe, ilegña nu sija: O generasion ni ti manjonggue! asta ngaean nae utafanjijitaja? asta ngaean nae jususungonja jamyo? maelayofan mague.
20 Ya maconie guato guiya güiya; ya anae jalie, enseguidas y espiritu manlálaolao güe; ya güiya podong gui jilo oda gumagalileg ya bóboan.
21 Ya jafaesen y tataña; cuanto tiempo esta desde qui mato este guiya güiya? Güiya ilegña: Desde qui diquique:
22 Ya megae na biaje nae yinite gui jalom guafe, yan y jalom janom para upinino; lao yaguin siña jao ayudajam, gaemaase nu jame.
23 Si Jesus, ilegña nu güiya: Yaguin siña jao, todo siña para y manjonggue.
24 Enseguidas y tatan y patgon, jaagang yan y lagoña, ya elegña: Jujonggue; ayuda y taejinenggueco.
25 Ya anae si Jesus jalie na manmalalago y linajyan taotao, jalalatde y áplacha na espiritu, ilegña: Espiritun udo yan tanga, guajo jao tumago, juyong guiya güiya, ya chamo jumajalom talo guiya güiya.
26 Ayo nae y espiritu umagang, ya manlalaolao güe megae, ya jumuyong; ya güiya sumaga calang matae, enaomina megae ilegñija, na esta matae.
27 Lao si Jesus jamantiene canaeña, ya jinatsa güe; ya cajulo.
28 Ya anae jumalom güe gui jalom guma, y disipuluña sija mafaesen güe en secreto, ilegñija: Jafajam na ti innasiña yumute juyong?
29 Ya ilegña nu sija: Este na rasan anite sija, taya siña munajanao, na y tinayuyut.
30 Ya manmapos güije, manmalofan inanaco Galilea; ya ti malago na guaja utiningo güe.
31 Sa jafanagüe y disipuluña sija ya ilegña nu sija: Y Lajin taotao umaentrega gui canae taotao sija, ya umapuno; lao yaguin este matae, ucajulo talo despues di tres na jaane.
32 Lao sija ti jatungo este na sinangan, ya manmaañao na ujafaesen güe.
33 Ya mato guiya Capernaum; ya anae mato gui guima, jafaesen sija: Jafa jamyo na manafaesen entalomiyoja gui chalan?
34 Lao sija manmamatquiquiloja; sa guine manafaesen gui chalan uno y otro, jaye guiya sija udangculo.
35 Ayo nae manmatachong, ya jaagang y dose ya ilegña nu sija: Y malago fuminenana, uuttimon gui tododos, yan utentagon tododos.
36 Ya jacone un patgon, ya japolo gui entaloñija; ya jajogüe gui canaeña, ya ilegña nu sija:
37 Y rumesibe pot y naanjo uno ni manaegüine na famaguon, jaresibe yo, ya y rumesibe yo, ti guajo jaresibe, na y tumago yo.
38 Si Juan, ilegña nu güiya: Maestro, inlie uno na manyute juyong anite sija pot y naanmo, ya inchema, sa ti jadadalalagjit.
39 Ya si Jesus ilegña: Chamiyo chumochoma; sa ni uno ni fumatinas milagro pot y naanjo, siña gusisija jasangan taelaye guiya guajo.
40 Sa ayo y ti contra jita, manjijitaja.
41 Sa jayeja y numae jamyo un copan janom, sa iyon Cristo jamyo, magajet jusangane jamyo, na sen ti ufalingo y apasña.
42 Ya jayeja y ninaquepodong uno guine sija gui mandiquique ni jumonggue yo; mauleg para güiya, umagode gui agagaña un acho atutong, ya umayute gui jalom tase.
43 Lao yaguin y canaemo ninaquepodong jao, utut; maulegña na unjalom gui linâlâ mangco, qui uguaja dos canaemo, ya unjanao para sasalaguan, y guafe ni ti siña mapuno.
44 (Anae y iloñija ti ufanmatae; ya y guafe taejinecog nae umapuno.)
45 Ya yaguin y adengmo ninaquepodong jao, utut: maulegña na unjalom gui linâlâ cojo, qui uguaja dos adengmo ya unyenite para sasalaguan;
46 (Anae y iloñija ti ufanmatae, ya y guafe taejinecog nae umapuno.)
47 Ya yaguin y atadogmo ninaquepodong jao, lagnos; maulegña na unjalom gui raenon Yuus, yan un atadogja, qui uguaja dos atadogmo ya unyenite para sasalaguan.
48 (Anae y iloñija ti ufanmatae, ya y guafe taejinecog na umapuno.)
49 Sa todos ufanmaasne yan guafe; (ya todo y inefrese ufanmaasne yan asiga). 50 Mauleg y asiga; lao yaguin y asiga malingo y maasenña, jaftaemano numamaasen? Guaja asiganmiyo guiya jamyoja; yan guaja pas gui entalomiyo.
KAPÍTULU 9
1 Ya ilek-ña nu siha: Magåhet hu sangåni hamyo, na guaha palu siha ni manggaige guini na ti u ha guaha finatai, asta ki ha li’e’ i rainon Yu’os na måtto yan nina’siña.
2 Annai esta maloffan i sais na ha’åni, si Jesus ha konne’ si Pedro, yan si Santiago, yan si Juan, ha na’fañahnge siha ha’ gi un tákhilo’ na okso’ ya ha a’go gui’ gi me’nan-ñiha.
3 Ya i magagu-ña manmañila’, goså’paka’ kalang niebe, tåya’ ni un fáfa’gas gi tano’ siña muna’å’paka’ taiguini.
4 Ya manáli’e’ na måtto giya guiya si Elias yan Moisés, na manguénguentos yan si Jesus.
5 Ayu nai manoppe si Pedro, ilek-ña as Jesus: Ma’estro maolek u ta fañåga hit guini, ya ta fanmama’tinas tres tabetnåkulu; para hågu i unu, para si Moisés i otro, yan para si Elias i otro.
6 Sa’ ti ha tungo’ håfa u sångan, sa’ eståba manggosma’å’ñao.
7 Ya måtto un mapagåhes i manhinemme siha, ya un inagang gi mapagåhes, ilek-ña: Este i guinaiya-kuna lahi-hu, hingok gui’.
8 Ya derepente ha atan gi uriyan-ñiha, ti manmanli’e’ ni håyi, na si Jesus ha’ yan siha.
9 Ya annai manunok siha ginen i ekso’, ha enkåtga siha na cha’-ñiha sumangångani ni håyi ni lini’e’-ñiha, asta ki i Lahen taotao esta kahulo’ ginen entalo’ i manmåtai.
10 Ya siha ha adahi ayu na sinangan giya siha ha’,manáfaisen gi entalo’-ñiha: Håfa ayu i kahulo’ ginen entalo’ i manmåtai kuméke’ilek-ña.
11 Ya ma faisen gui’, ilek-ñiha: I eskriba siha ilek-ñiha, si Elias nisisita u fåtto fine’nana.
12 Guiya manoppe ilek-ña nu siha: Si Elias magåhet nisisita u fåtto fine’nana, ya ha fa’tinas ta’lo todu i guinaha: Håfa esta matuge’ gi Lahen taotao na u padesi meggai ya mana’tåya’ guailaye-ña?
13 Lao hu sangåni hamyo na si Elias esta måtto ya esta mafa’tinas giya guiya todu i malago’-ñiha, taiguini esta matuge’ nu guiya.
14 Ya annai måtto gi disipulu-ña siha, ha li’e’ un dångkolon linahyan taotao gi uriyan-ñiha, yan i eskriba siha ni manáfaisen yan siha.
15 Ya ensigidas todu i linahyan taotao, annai mali’e’ gui’, nina’fangosmanman, ya manmalågu guatu giya guiya ya masaluda gui’.
16 Ya ha faisen siha, ilek-ña: Håfa na manáfaisen hamyo yan siha?
17 Ya manoppe unu gi linahyan taotao, ilek-ña: Ma’estro hu konne’i hao mågi na lahi-hu, na guaha un espiriton udu;
18 Ya månu ha’ nai kinenne’ gui’, ha pedådasos; ya bóboan, ya ha na’chéchekchek i nifen-ña, ya nina’yåfai; ya hu sangåni i disipulu-mu siha, na u ha yute’ huyong, lao ti ma na’siña.
19 Manoppe gui’, ilek-ña nu siha: O henerasión ni ti manhongge! Asta ngai’an nai u ta fanhíhita ha’? Asta ngai’an nai hu súsungon ha’ hamyo? Maila’ yu’ fan mågi.
20 Ya ma konne’i guatu giya guiya; ya annai ha li’e’, ensigidas i espiritu manlálaolao gui’; ya guiya poddong gi hilo’ odda’ gumágálilek ya bóboan.
21 Ya ha faisen i tatå-ña; kuånto tiempo esta desde ki måtto este giya guiya? Guiya ilek-ña: Desde ki dikike’:
22 Ya meggai na biåhi nai yinite’ gi halom guåfi, yan i halom hånom para u pinino’; lao yanggen siña hao ayuda ham, gáima’ase’ nu hami.
23 Si Jesus, ilek-ña nu guiya: Yanggen siña hao, todu siña para i manhongge.
24 Ensigidas i tatan i patgon, ha ågang yan i lago’-ña, ya ilek-ña: Hu hongge; ayuda i táihinengge-ku.
25 Ya annai si Jesus ha li’e’ na manmalålagu i linahyan taotao, ha lalåtde i áplacha’ na espiritu, ilek-ña: Espiriton udu yan tangnga, guåhu hao tumågo’, huyong giya guiya, ya cha’-mu humåhalom ta’lo giya guiya.
26 Ayu nai i espiritu umågang, ya manlålaolao gui’ meggai, ya humuyong; ya guiya sumåga kalang måtai, ennao mina’meggai ilek-ñiha, na esta måtai.
27 Lao si Jesus ha mantieni kannai-ña, ya hinatsa gui’; ya kahulo’.
28 Ya annai humålom gui’ gi halom guma’, i disipulu-ña siha ma faisen gui’ en sikretu, ilek-ñiha: Håfa ham na ti in na’siña yumute’ huyong?
29 Ya ilek-ña nu siha: Este na råsan aniti siha, tåya’ siña muna’hånao, na i tináyuyot.
30 Ya manmå’pos guihi, manmaloffan inanåkko’ Galilea; ya ti malago’ na guaha u tiningo’ gui’.
31 Sa’ ha fa’nå’gue i disipulu-ña siha ya ilek-ña nu siha: I Lahen taotao u ma entrega gi kannai taotao siha, ya u mapuno’; lao yanggen este måtai, u kahulo’ ta’lo despues di tres na ha’åni.
32 Lao siha ti ha tungo’ este na sinangan, ya manma’å’ñao na u ha faisen gui’.
33 Ya måtto giya Capernaum; ya annai måtto gi gima’, ha faisen siha: Håfa hamyo na manáfaisen entalo’-miyu ha’ gi chalan?
34 Lao siha manmamatkíkilu ha’; sa’ ginen manáfaisen gi chalan unu i otro, håyi giya siha u dångkolo.
35 Ayu nai manmatå’chong, ya ha ågang i dosse ya ilek-ña nu siha: I malago’ fuminé’nana, u uttimo gi todudos, yan u tentågon todudos.
36 Ya ha konne’ un patgon, ya ha po’lo gi entalo’-ñiha; ya ha hoggue gi kannai-ña, ya ilek-ña nu siha:
37 I rumesibi put i na’ån-hu unu ni manaiguini na famagu’on, ha resibi yu’, ya i rumesibi yu’, ti guåhu ha resibi, na i tumågo’ yu’.
38 Si Juan, ilek-ña nu guiya: Ma’estro, in li’e’ unu na manyute’ huyong aniti siha put i na’ån-mu, ya in chemma’, sa’ ti ha dádalalak hit.
39 Ya si Jesus ilek-ña: Cha’-miyu chumóchomma’; sa’ ni unu ni fuma’tinas milågru put i na’ån-hu, siña gusse’ siha ha sångan tailayi giya guåhu.
40 Sa’ ayu i ti kontra hita, manhíhita ha’.
41 Sa’ håyi ha’ i numå’i hamyo un kopan hånom, sa’ iyon Kristu hamyo, magåhet hu sangåni hamyo, na sen ti u falingu i apås-ña.
42 Ya håyi ha’ i nina’képoddong unu ginen siha gi mandíkike’ ni’ humongge yu’; maolek para guiya, u magodde gi aga’gå-ña un åcho’ atutong, ya u mayute’ gi halom tåsi.
43 Lao yanggen i kannai-mu nina’képoddong hao, utot; maolekña na un hålom gi lina’la’ mångko, ki u guaha dos kannai-mu, ya un hånao para sasalåhguan, i guafi ni’ ti siña mapuno’.
44 (Annai i ilo’-ñiha ti u fanmåtai; ya i guafi taihinekkok nai u mapuno’.)
45 Ya yanggen i addeng-mu nina’képoddong hao, utot: maolekña na un hålom gi lina’la’ kohu, ki u guaha dos addeng-mu ya un yinite’ para sasalåhguan;
46 (Annai i ilo’-ñiha ti u fanmåtai, ya i guafi taihinekkok nai u mapuno’.)
47 Ya yanggen i attadok-mu nina’képoddong hao, laknos; maolekña na un hålom gi rainon Yu’os, yan un attadok ha’, ki u guaha dos attadok-mu ya un yinite’ para sasalåhguan.
48 (Annai i ilo’-ñiha ti u fanmåtai, ya i guafi taihinekkok na u mapuno’.)
49 Sa’ todus u fanma’åsne yan guåfi; (ya todu i inefresi u fanma’åsne yan asiga).
50 Maolek i asiga; lao yanggen i asiga malingu i ma’asen-ña, haftaimanu numa’ma’asen? Guaha asigan-miyu giya hamyo ha’; yan guaha pås gi entalo’-miyu.
Put fabót, leave a comment or ask a question below.