CAPITULO 4
1 Y A jatutujon otro biaje mananagüe gui oriyan tase; ya mandaña guiya güiya dangculo na linajyan taotao, enao mina jumalom gui un batco, ya matachong gui tase; ya todo y linajyan taotao manestaba gui jilo tano gui oriyan tase.
2 Ya jafanagüe sija megae pot acomparasion, ya ilegña nu sija gui finanagüeña.
3 Ecungog: Estagüe y tatanom na jumuyong para ufananom.
4 Ya anae manananom, palo mamodong gui oriyan chalan; ya mato y pajaron y aire ya macano.
5 Ya y palo mamodong gui jilo acho, anae ti megae na oda; ya enseguidas mandoco, sa ti tadong gui eda.
6 Lao anae cajulo y atdao, sinenggue, sa taejaleñija manmalayo.
7 Ya y palo mamodong gui entalo tituca sija; ya mandoco y tituca sija, ya chiniguet, ya ti manogcha.
8 Ya y palo mamodong gui mauleg na tano, ya manmanogcha, ya mangajulo ya manmegae; ya uno manogcha treinta, y otro sesenta, y otro ciento.
9 Ayo nae ilegña nu sija: Y gae talanga para ufanjungog, güiya uecungog.
10 Ya anae estaba güe güiyaja, y manestaba gue oriyaña yan y dose, mafaesen güi ni y acomparasion sija.
11 Ya ilegña nu sija: Jamyo manmanae y misterion raenon Yuus; lao y mangaegue gui sumanjiyong, pot acomparasion nae umafatinas todo estesija;
12 Para y manlilie, jalie ya ti jasiente; ya y manecungog, manmanjungog, lao ti jatungo; sa no sea ufanmabra talo, ya ufanmmaasie ni isaoñija.
13 Ya ilegña nu sija: Ti intingo este na acomparasion? Jafa taemano nae, tungonmiyo todo ni acomparasion sija?
14 Y tatanom jatanme y finijo.
15 Ya este yuje sija y oriyan chalan, anae manmatanme y finijo; lao despues di jajungog, mato si Satanas, enseguidas, ya janajanao y finijo ni matanme gui corasonñija.
16 Parejoja locue yan este sija y manmatanme gui jilo acho; anae majungog y finijo, enseguidas maresibe todo ni y minagofñija;
17 Lao taya jaleñija, ya ti jadura apmam; sa anae cajulo y triniste, pat y pinetsigue pot y finijo, enseguidas maninefende.
18 Ya este yuje sija y manmatanme gui entalo tituca sija; y jumungog y finijo;
19 Lao y inadajen este y tano, yan y dinaguen y güinaja sija, yan y minalago ni guaja gui palo güinaja sija, manjalom ya machiguet y finijo ya jumuyong ti manogcha.
20 Ya este yuje sija y manmatanme gui mauleg na tano; y jumungog y finijo ya maresibe, ya manmanogcha, ya uno treinta y otro sesenta, y otro siento.
21 Ylegña nu sija locue: Esta machule y candet para umapolo gui papa medida, pat gui papa cama? Ya ti para umapolo gui jilo lamasa?
22 Sa taya na manaatog, ti umafatanñaejon; ni gae gui secreto ya ti umababa.
23 Yaguin guaja gaetalanga para ufanjungog, güiya uecungog.
24 Ylegña nu sija locue: Adaje jafa y jiningogmiyo. Y medida anae inmediye sija, ayoja nae infanmamidiye jamyo; ya infanmanae jamyo mas.
25 Sa y guaja, umanae: ya y taya, esta y güinajaña, unajanao.
26 Ya ilegña: Taegüine y raenon Yuus, yaguin un taotao manyute semiya gui jalom oda;
27 Ya maego, ya cajulo gui puenge yan jaane, ya semiya mapta ya doco, ti jatungo jafataemano.
28 Sa y tano güiyaja manogcha, finena jagon, enseguidas y espiga, despues y grano bula gui espiga.
29 Ya yaguin y tinegcha dumangculo, enseguidas mapolo y sese para mangoco, sa mato y cosecha.
30 Ya ilegña: Jafajit nae tanaparejo y raenon Yuus? pat jafa na acomparasion nae taacompara?
31 Parejo yan un granon mostasa, ni y anae matanme gui tano, achogja güiya mas diquique gui entalo todo y semiya sija ni y guaja gui jilo y tano.
32 Lao anae matanme, doco, ya güiya mas dangculo qui todo na golae, ya manramas ni mandangculo na ramasña; ya pot este y pajaron y aire siña mañaga gui papa y nijongña.
33 Yan megae sija na acomparasion parejo yan este sija, jasangane sija finijo, jaftaemano y siña jajungog.
34 Ya sin acomparasion ti jasangane sija; lao y disipoluña sija anae mañisijaja janaclaruye todo.
35 Ya ilegña nu sija güijija na jaane, anae esta pupuenge: Nije tafanmalofan gui otro banda.
36 Ya jadingo y linajyan taotao, ya macone güe mañija, anae gaegue güe sui jalom batco. Ya guaja locue palo diquique na batco mañisija.
37 Ya cajulo un dangculon pagyon manglo, ya jinatme ni napo sija y jalom batco, ya ninabula.
38 Ya güiya gaegue gui popa na mamaego gui jilo alunan; ya mayajo, ya ilegñija nu güiya: Maestro, taya unadadaje na infanmatae?
39 Ya cajulo güe, ya jalalatde y manglo, ya ilegña ni tase: Pacaca famatquilo. Ya bumasta y manglo, ya guaja dangculo na catma.
40 Ya ilegña nu sija: Jafa jamyo na gosmanmaañao? Taye jinengguenmiyo trabia?
41 Ya mangosmanmaañao, ya ilegñija entre sija: Jaye este, na asta y manglo yan y tase maosgue güe?
KAPÍTULU 4
I Ya ha tutuhon otro biåhi mana’nå’gue gi uriyan tåsi; ya mandanña’ giya guiya dångkolo na linahyan taotao, ennao mina’ humålom gi un båtko, ya matå’chong gi tasi; ya todu i linahyan taotao maneståba gi hilo’ tåno’ gi uriyan tåsi.
2 Ya ha fa’nå’gue siha meggai put akomparasión, ya ilek-ña nu siha gi fina’nå’gue-ña.
3 Ékungok: Éstague’ i tátanom na humuyong para u fanånom.
4 Ya annai manånanom, palu mamoddong gi uriyan chålan; ya måtto i pahårun i aire ya ma kånno’.
5 Ya i palu mamoddong gi hilo’ acho’, annai ti meggai na odda’; ya ensigidas mandokko’, sa’ ti tåddong gi edda’.
6 Lao annai kahulo’ i atdao, sinengge, sa’ táihale’-ñiha manmalåyu.
7 Ya i palu mamoddong gi entalo’ tituka’ siha; ya mandokko’ i tituka’ siha, ya chiniget, ya ti manogcha’.
8 Ya i palu mamoddong gi maolek na tåno’, ya manmanogcha’, ya mangahulo’ ya manmeggai; ya unu manogcha’ trenta, i otro sisenta, i otro siento.
9 Ayu nai ilek-ña nu siha: I gáitalanga para u fanhungok, guiya u ékungok.
10 Ya annai eståba gui’ guiya ha’, i maneståba gue uriyå-ña yan i dosse, mafaisen gui’ ni’ i akomparasión siha.
11 Ya ilek-ña nu siha: Hamyo manmanå’i i misterion rainon Yu’os; lao i manggaige gi suménhiyong, put akomparasión nai u mafa’tinas todu este siha;
12 Para i manlíli’e’, ha li’e’ ya ti ha siente; ya i manékungok, manmanhungok, lao ti ha tungo’; sa’ noseha u fanmabra ta’lo, ya u fanma’asi’e ni isao-ñiha.
13 Ya ilek-ña nu siha: Ti en tingo’ este na akomparasión? Håfa taimanu nai, tungon-miyu todu ni akomparasión siha?
14 I tátanom ha tånme i fino’-hu.
15 Ya este yuhi siha i uriyan chålan, annai manmatånme i fino’-hu; lao despues di ha hungok, måtto si Satanås, ensigidas, ya ha na’hånao i fino’-hu ni’ matånme gi kurason-ñiha.
16 Parehu ha’ lokkue’ yan este siha i manmatånme gi hilo’ åcho; annai mahungok i fino’-hu, ensigidas ma resibi todu ni’ i minagof-ñiha;
17 Lao tåya’ håle-ñiha, ya ti hadura åpmam; sa’ annai kahulo’ i triniste, pat i pinetsigi put i fino’-hu, ensigidas maninefende.
18 Ya este yuhi siha i manmatånme gi entalo’ tituka’ siha; i humungok i fino’-hu;
19 Lao i inadahen este i tano’, yan i dinaguen i guinaha siha, yan i minalago’ ni guaha gi palu guinaha siha, manhålom ya machiget i fino’-hu ya humuyong ti manogcha’.
20 Ya este yuhi siha i manmatånme gi maolek na tåno’; i humungok i fino’-hu ya ma resibi, ya manmånogcha’, ya unu trenta i otro sisenta, i otro siento.
21 Ilek-ña nu siha lokkue’: Esta machule’ i kandet para u mapo’lo gi papa’ medida, pat gi papa’ kåma? Ya ti para u mapo’lo gi hilo’ lamasa?
22 Sa’ tåya’ na mana’atok, ti u ma fatanñaihon; ni’ gaige sikretu ya ti umababa.
23 Yanggen guaha gáitalanga para u fanhungok, guiya u ékungok.
24 Ilek-ña nu siha lokkue’: adahi håfa i hiningok-miyu. I medida annai en mediyi siha, ayu ha’ nai en fanmamidiyi hamyo; ya en fanmanå’i hamyo mås.
25 Sa’ i guaha, u manå’i: ya i taya’, esta i guinahå-ña, u na’hånao.
26 Ya ilek-ña: Taiguini i rainon Yu’os, yanggen un taotao manyute’ simiya gi halom odda’;
27 Ya maigo’, ya kahulo’ gi puengi yan ha’åni, ya simiya måpta’ ya dokko’, ti ha tungo’ håfa taimanu.
28 Sa’ i tano’ guiya ha’ manogcha’, fine’na hågon, ensigidas i espiga, despues i grano bula gi espiga.
29 Ya yanggen i tinekcha’ dumångkolo, ensigidas ma po’lo i se’se’ para mangokko’, sa’ måtto i kosecha.
30 Ya ilek-ña: Håfa hit nai ta na’parehu i rainon Yu’os? Pat håfa na akomparasión nai ta akompåra?
31 Parehu yan un grånon moståsa, ni’ i annai ma tånme gi tano’, achokka’ guiya mås dikike’ gi entalo’ todu i simiya siha ni’ i guaha gi hilo’ i tano’.
32 Lao annai matånme, dokko’, ya guiya mås dångkolo ki todu na gollai, ya manråmas ni’ mandångkolo na ramås-ña; ya put este i pahårun i aire siña mañåga gi papa’ i nihong-ña.
33 Yan meggai siha na akomparasión parehu yan este siha, ha sangåni siha fino’-hu, haftaimanu i siña ha hungok.
34 Ya sin akomparasión ti ha sangåni siha; lao i disipulu-ña siha annai mañisiha ha’ ha na’klåruyi todu.
35 Ya ilek-ña nu siha guihi ha’ na ha’åni, annai esta pupuengi: Nihi ta fanmaloffan gi otro bånda.
36 Ya ha dingu i linahyan taotao, ya ma konne’ gui’ manñiha, annai gaige gui’ sui halom båtko. Ya guaha lokkue’ palu dikike’ na båtko mañisiha.
37 Ya kahulo’ un dångkolon påkyon månglo’, ya hinatme ni nåpu siha i halom båtko, ya nina’bula.
38 Ya guiya gaige gi popa na mamaigo’ gi hilo’ alunan; ya ma yå’ho, ya ilek-ñiha nu guiya: Ma’estro, tåya’ un adadahi na in fanmåtai?
39 Ya kahulo’ gui’, ya ha lalåtde i manglo’, ya ilek-ña ni tasi: Påkaka’ famatkilu. Ya bumåsta i manglo’, ya guaha dångkolo na kåtma.
40 Ya ilek-ña nu siha: Håfa hamyo na gosmanma’å’ñao? Tåya’ hinenggen-miyu trabiha?
41 Ya man gosmanma’a’ñao, ya ilek-ñiha entre siha: Håyi este, na asta i manglo’ yan i tasi ma osge gui’?
Put fabót, leave a comment or ask a question below.