CAPITULO 8
1 AYO sija na jaane, anae guaja talo un dangculon linajyan taotao ya taya jafa nañija, si Jesus jaagang y disipuluña sija, ya ilegña nu sija:
2 Maase yo ni linajyan taotao sa esta tres jaane na manjame; ya taya jafa nañija.
3 Yaguin junafanjanao sin mañocho para iyasija, ufanlalango gui chalan; sa palo guiya sija manmato guine y chago.
4 Ya y disipuluña sija, maope güe: Guine mano nae siña manafanjaspog este taotao sija pan, güine gui desierto?
5 Guiya jafaesen sija: Cuanto na pan guaja jamyo? Ylegñija, siete.
6 Ayo nae jatago y linajyan taotao na ufanason gui jilo oda; ya jachule y siete na pan, ya janae Yuus maase ya jaipe, ya janae y disipuluña sija para ujaplanta gui menanñija; ya sija japlanta gui menan y linajyan taotao.
7 Yan guaja locue palo mandiquique na güijan sija; ya anae jabendise, jatago na ujaplanta locue gui menanñija.
8 Pues mañocho, ya manjaspog; ya majatsa y pidaso sija ni sebbla, siete canastra.
9 Ya y mañocho sija, buente cuatro mit; ya jadespide.
10 Ya enseguidas jumalom gui batco yan y disipuluña sija, ya manmato gui oriyan Dalmanuta.
11 Ya manmato y Fariseo sija, ya matutujon manafaesen yan güiya, manmanaliligao guiya güiya un señat guine y langet, matietienta güe.
12 Ya sumospiros gostadong gui espirituña, ya ilegña: Jafa na mangagagao señat este na generasion? Magajet jusangane jamyo, na ti umanae señat este na generasion.
13 Ya jadingo sija, ya jumalom talo gui batco, ya mapos para y otro banda.
14 Ya manmalefa ti manmañule pan, ya taya na unoja na pan gui batco.
15 Ya jaencatga sija, ilegña: Atan, adaje jamyo ni lebaduran y Fariseo sija, yan y lebaduran Herodes.
16 Ya manafaesen gui entalo sija, ilegña: Pot y taya panta.
17 Ya anae jatungo si Jesus ilegña nu sija: Jafa manafaesen gui entalomiyo pot y taya panmiyo? Ti injaso ni ti intingo? Majejetogja trabia y corasonmiyo?
18 Guaja atadogmiyo, lao ti manmanlilie jamyo? Guaja talanganmiyo, ya ti manmanjujungogja jamyo? Ya ti injajasoja?
19 Anae juipe y sinco na pan sija entalo y sinco mit, cuanto na canastra injatsa bula ni pidaso sija ni sebbla? Ylegñija: Dose.
20 Ya anae y siete na pan sija entalo y cuatro mit, cuanto na canastra injatsa bula ni pidaso sija ni sebbla? Ylegñija: Siete.
21 Güiya ilegña nu sija: Ti intingo asta pago?
22 Ya mato guiya Betsaida; ya maconie güe guato un bachet, ya matayuyut güe na upacha güe.
23 Ayo nae jamantiene y canae y bachet, ya jacone asta y jiyong y siuda; ya anae jatolae y atadogña, japolo y canaeña gui jiloña, ya jafaesen: Unlie jafa?
24 Ya güiya manatan ya, ilegña: Julie taotao sija; lao julie sija calang trongconjayo na manmamómocat.
25 Entonses japolo ya canaeña talo gui atadogña ya jaguefatan; ya jomlo, ya manlie claro todo.
26 Ya jatago para iyasija, ilegña: Chamo jumajalom gui sengsong (ni usangane jaye gui siuda).
27 Ya mapos si Jesus yan y disipuluña sija gui sensong sija y Cesarean Felipe: ya y chalan jafaesen y disipuluña sija, ilegña nu sija: Jaye ilegñija y taotao sija nu guajo?
28 Ya sija masangane güe, ilegñija: Si Juan Bautista; y palo ilegñija: Si Elias; y palo ilegñija: Uno gui profeta sija.
29 Ayo nae jafaesen sija: Ya jamyo, jaye ilegmiyo nu guajo? Inepe as Pedro ilegña: Jago si Cristo jao.
30 Ya jaencatga sija na chañija sumangangane ni jaye pot güiya.
31 Ya jatutujon fumanagüe sija na y Lajin taotao janesesita upadese megae, ya umarechasa ni manamco sija, yan y prinsipen y mamale sija, yan y escriba sija, ya umapuno; ya ucajulo talo gui mina tres na jaane.
32 Ya claroja nae jasangan este na sinangan. Ayo nae si Pedro quinene güe, ya tinitujon güe rineprende.
33 Lao anae jabira güe, ya jaatan y disipuluña sija, jalalatde si Pedro ilegña: Suja guiya guajo, Satanas; sa ti unadadaje y güinaja sija ni para si Yuus, na y güinajan taotao sija.
34 Ya jaagang y linajyan taotao yan y disipuluña sija, ya ilegña nu sija; Jaye y malago tumatiye yo, upune maesa güe, ya uchule y quiluusña ya udalalagyo.
35 Sa y malago sumatba y linâlâña, ufinalingaeguan; lao y finalingaeguan ni linâlâña pot guajo, yan y ibangelio, este usatba y linâlâña.
36 Sa, jafa uaprobecha y taotao, yaguin jagana todo y tano, ya finalingaeguan ni linâlâña?
37 Pat jafa na apas ufannae y taotao pot y linâlâña?
38 Sa y mamajlao nu guajo yan y sinaganjo, gui sanmenan este y generasion ábale yan gaeisao, unimamajlaogüe locue ni Lajin taotao y tiempo nae mato gui minalag y Tataña, yan y mañantos na angjetña sija.
KAPÍTULU 8
1 Ayu siha na ha’åni, annai guaha ta’lo un dångkolon linahyan taotao ya tåya’ håfa na’-ñiha, si Jesus ha ågang i disipulu-ña siha, ya ilek-ña nu siha:
2 Ma’åse’ yu’ ni linahyan taotao sa’ esta tres ha’åni na manhami; ya tåya’ håfa na’-ñiha.
3 Yanggen hu na’fanhånao sin mañocho para iya siha, u fanlálangu gi chalan; sa’ palu giya siha manmåtto ginen i chago’.
4 Ya i disipulu-ña siha, ma oppe gui’: Ginen månu nai siña ma na’fanhåspok este taotao siha pån, guini gi disietto?
5 Guiya ha faisen siha: Kuånto na pån guaha hamyo? Ilek-ñiha, siette.
6 Ayu nai ha tågo’ i linahyan taotao na u fanåsson gi hilo’ odda’; ya ha chule’ i siette na pån, ya ha nå’i Yu’os ma’åse’ ya ha ipe’, ya ha nå’i i disipulu-ña siha para u ha plånta gi me’nan-ñiha; ya siha ha plånta gi me’nan i linahyan taotao.
7 Yan guaha lokkue’ palu mandikike’ na guihan siha; ya annai ha bendisi, ha tågo’ na u ha plånta lokkue’ gi me’nan-ñiha.
8 Pues mañocho, ya manhåspok; ya ma håtsa i pidåsu siha ni sepbla, siette kanåstra.
9 Ya i mañocho siha, buente kuåttro mit; ya ha despidi.
10 Ya ensigidas humålom gi batko yan i disipulu-ña siha, ya manmåtto gi uriyan Dalmanuta.
11 Ya manmåtto i Fariseho siha, ya ma tutuhon manáfaisen yan guiya, manmanalíligao giya guiya un siñåt ginen i langet, matiétienta gui’.
12 Ya sumosperos goståddong gi espiritu-ña, ya ilek-ña: Håfa na manggågagao siñåt este na henerasión? Magåhet hu sangåni hamyo, na ti u manå’i siñåt este na henerasión.
13 Ya ha dingu siha, ya humålom ta’lo gi batko, ya må’pos para i otro bånda.
14 Ya manmaleffa ti manmañule’ pån, ya tåya’ na unu ha’ na pån gi batko.
15 Ya ha enkåtga siha, ilek-ña: Atan, adahi hamyo ni lebaduran i Fariseho siha, yan i lebaduran Herodes.
16 Ya manáfaisen gi entalo’ siha, ilek-ña: Put i taya’ pån-ta.
17 Ya annai ha tungo’ si Jesus ilek-ña nu siha: Håfa manáfaisen gi entalo’-miyu put i taya’ pån-miyu? Ti en hasso ni ti en tingo’? Mahéhetok ha’ trabiha i kurason-miyu?
18 Guaha attadok-miyu, lao ti manmanlíli’e’ hamyo? Guaha talangan-miyu, ya ti manmanhúhungok ha’ hamyo? Ya ti en háhasso ha’?
19 Annai hu ipe’ i singko na pån siha entalo’ i singko mit, kuånto na kanåstra en håtsa bula ni pidåsu siha ni sepbla? Ilek-ñiha: Dosse.
20 Ya annai i siette na pån siha entalo’ i kuåttro mit, kuånto na kanåstra en håtsa bula ni pidåsu siha ni sepbla? Ilek-ñiha: Siette.
21 Guiya ilek-ña nu siha: Ti en tingo’ asta på’go?
22 Ya måtto giya Betsaida; ya ma konne’ gui’ guatu un båchet, ya ma tåyuyot gui’ na u pacha gui’.
23 Ayu nai ha mantieni i kannai i bachet, ya ha konne’ asta i hiyong i siudá; ya annai ha to’la’i i attadok-ña, ha po’lo i kannai-ña gi hilo’-ña, ya ha faisen: Un li’e’ håfa?
24 Ya guiya manatan ya, ilek-ña: Hu li’e’ taotao siha; lao hu li’e’ siha kalang trongkon håyu na manmamómokkat.
25 Entonses ha po’lo i kannai-ña ta’lo gi attadok-ña ya ha géfatan; ya homlo’, ya manli’e’ klåru todu.
26 Ya ha tågo’ para iya siha, ilek-ña: Cha’-mu humåhalom gi sengsong (ni u sangåni håyi gi siudá).
27 Ya må’pos si Jesus yan i disipulu-ña siha gi sengsong siha i Cesarean Felipe: ya i chalan ha faisen i disipulu-ña siha, ilek-ña nu siha: Håyi ilek-ñiha i taotao siha nu guåhu?
28 Ya siha ma sangåni gui’, ilek-ñiha: Si Juan Bautista; i palu ilek-ñiha: Si Elias; i palu ilek-ñiha: Unu gi profeta siha.
29 Ayu nai ha faisen siha: Ya hamyo, håyi ilek-miyu nu guåhu? Ineppe as Pedro ilek-ña: Hågu si Kristu hao.
30 Ya ha enkåtga siha na cha’-ñiha sumangångani ni håyi put guiya.
31 Ya ha tutuhon fuma’nå’gue siha na i Lahen taotao ha nisisita u padesi meggai, ya u marichåsa ni manåmko’ siha, yan i prinsipin i mamåle’ siha, yan i eskriba siha, ya u mapuno’; ya u kahulo’ ta’lo gi mina’ tres na ha’åni.
32 Ya klåru ha’ nai ha sångan este na sinangan. Ayu nai si Pedro kinenne’ gui’, ya tinituhon gui’ rineprende.
33 Lao annai ha bira gui’, ya ha atan i disipulu-ña siha, ha lalåtde si Pedro ilek-ña: Suha giya guåhu, Satanås; sa’ ti un adádahi i guinaha siha ni para si Yu’os, na i guinahan taotao siha.
34 Ya ha ågang i linahyan taotao yan i disipulu-ña siha, ya ilek-ña nu siha; Håyi i malago’ tumattiyi yu’, u punen maisa gui’, ya u chule’ i kilu’os-ña ya u dálalak yu’.
35 Sa’ i malago’ sumåtba i lina’lå’-ña, u fina’lingaiguan; lao i fina’lingaiguan ni lina’lå’-ña put guåhu, yan i ebanghelio, este u såtba i lina’lå’-ña.
36 Sa’, håfa u aprobecha i taotao, yanggen ha gånna todu i tano’, ya fina’lingaiguan ni lina’lå’-ña?
37 Pat håfa na åpas u fannå’i i taotao put i lina’lå’-ña?
38 Sa’ i mamåhlao nu guåhu yan i sinangån-hu, gi sanme’nan este i henerasión ábale’ yan gái’isao, unimamajlaogüe lokkue’ ni Lahen taotao i tiempo nai måtto gi mina’lak i tatå-ña, yan i mañåntos na anghet-ña siha.